ත්‍රිපෝෂ සමාගම මෙරට ජනතාවගේ පෝෂණ අවශ්‍යතා සම්පූර්ණ කිරීම වෙනුවෙන් නව්‍යකරණයට ලක්කර සංවර්ධනය කරමින් රජය සතු ආයතනයක් ලෙස අඛණ්ඩව පවත්වාගෙන යාමට රජය තීරණය කර තිබෙනවා.
සෞඛ්‍ය අමාත්‍යවරයාගේ ප්‍රධානත්වයෙන් ත්‍රිපෝෂ සමාගමේ වත්මන් තත්ත්වය සහ එහි ඉදිරි සංවර්ධන කටයුතු පිළිබඳ අදාළ නිලධාරීන් සමඟ ඊයේ (04) පැවැත් වූ සාකච්ඡාවක දී මෙම කරුණු අනාවරණය වුණා.
සෞඛ්‍ය අමාත්‍ය නලින්ද ජයතිස්ස මෙහිදී පැවසුවේ පැවැති රජයන් මෙම ත්‍රිපෝෂ සමාගම සංවර්ධනය කර එහි ප්‍රතිලාභ ජනතාවට ලබා දීමට විධිමත් සහ ඉලක්කගත වැඩපිළිවෙළක් ක්‍රියාත්මක නොකිරීම මත එහි ප්‍රතිලාභ ජනතාවට අහිමි වන තත්ත්වයක් පත්ව තිබූ බවයි.
එම තත්ත්වය වෙනස් කර නැවත ත්‍රිපෝෂ සමාගම ජනතාවගේ පෝෂණ අවශ්‍යතා සපයන සක්‍රීය ආයතනයක් බවට පත් කිරීමේ අරමුණ බවයි අමාත්‍යවරයා මෙහිදී වැඩිදුරටත් සඳහන් කළේ.
එමෙන්ම ත්‍රීපෝෂ නිෂ්පාදන ආයතනය ඈවර කිරීමට ද පසුගිය ආණ්ඩුව තීන්දු කර තිබූ බව ද ඔහු මෙහි දී සඳහන් කර සිටියා.
