ජාත්‍යන්තර බැඩ්මින්ටන් තරගාවලියක් පැවැත්වෙන අතරතුර 17 හැවිරිදි ක්‍රීඩකයෙකු පිටිය මැද ඇදවැටී ජීවිතක්ෂයට පත්වීමේ ඛේදනීය පුවතක් විදෙස් මාධ්‍ය වාර්තා කර තිබෙනවා.
AP පුවත් සේවය මෙම ප්‍රවෘත්තිය වාර්තා කරමින් සඳහන් කර ඇත්තේ මේ දිනවල (01) ඉන්දුනීසියාවේ යෝගකාර්තා පළාතේ පැවැත්වෙන ආසියානු කනිෂ්ඨ බැඩ්මින්ටන් තරගාවලියේ තරගයක් අතරතුර චීන ක්‍රීඩකයෙකු හදිසියේ ම පිටිය මැද ඇද වැටී ඇති බවත්; කඩිනමින් ඔහුව රෝහල්ගත කළ ද; හෙතෙම ජීවිතක්ෂයට පත් ව ඇති බවයි.
මෙලෙස මියගොස් ඇත්තේ චීන ක්‍රීඩකයෙකු වන Zhang Zhijie වන අතර; ඔහු මියයාමට ප්‍රථම ජපානයේ කසුමා කවානෝට එරෙහිව ක්‍රීඩා කරමින් සිටියා.
බැඩ්මින්ටන් නිලධාරීන් පැවසුවේ වෛද්‍ය කණ්ඩායම් ෂැංට කඩිනමින් ප්‍රතිකාර කළ අතර ගිලන් රථයකින් ඔහු අසල පිහිටි ප්‍රධාන රජයේ රෝහලක් වන වෛද්‍ය සර්ඩ්ජිටෝ වෙත ඇතුළත් කෙරුණා.
නමුත් ඒ වනවිටත් ඔහු ජීවිතක්ෂයට පත් ව සිටි බවයි වාර්තා වන්නේ.
ඒ වනවිට මියගිය ක්‍රීඩකයා සහ ජපන් ක්‍රීඩකයාගේ ලකුණු පුවරුව දැක්වුණේ ලකුණු 11-11ක් ලෙසයි.
කෙසේවෙතත් මෙම මරණය සම්බන්ධයෙන් ඉන්දුනීසියාවේ බැඩ්මින්ටන් සංගමයේ ප්‍රකාශක බ්‍රෝටෝ හැපි විශේෂ ප්‍රකාශයක් නිකුත් කර තිබෙනවා.
ඒ ක්‍රීඩකයාගේ මරණයට හේතු දක්වමින්.
වෛද්‍ය වාර්තා අනුව 17 හැවිරිදි චීන ක්‍රීඩකයා මෙලෙස හදිසියේ ම මරණයට පත් ව ඇත්තේ ඔහුට ඇති වූ හෘදයාබාධයක් හේතුවෙන් බවයි වාර්තා වන්නේ.
චීන ක්‍රීඩකයාගේ මරණයෙන් පසුව අද පැවැති ආසියානු කනිෂ්ඨ බැඩ්මින්ටන් තරගාවලියේ සෙසු තරග ආරම්භ වීමට පෙර චීන ක්‍රීඩකයාට සහ රටට ගරු කරමින් මිනිත්තුවක නිශ්ශබ්දතාවක් ද උපහාරය සහ ගෞරවය පුද කරමින් පැවැත්වුණා.
