ලෝකයේ බොහෝ දෙනාගේ අවධානයට ලක්ව ඇති ඩෙල්ටා වෛරසය (B.1.617.2) විකෘති වීමෙන් සෑදුනු ඩෙල්ටා ප්ලස් (Delta+) නමින් හැඳින්වෙන වෛරස් ප්‍රභේදයක් මේ වන විට ඉන්දියාවේ ප්‍රාන්ත කිහිපයක් පුරාවට පැතිර යමින් තිබෙන බවට වාර්තා වෙනවා.
ඉන්දියාවේ ප්‍රාන්ත 03ක් පුරාවට මේ වන විට මෙම වෛරසය පැතිර යෑම ආරම්භ වී ඇති අතර රෝගීන් 22 දෙනෙකුට වඩා හමුව ඇති බවත් සඳහන්.
ඉන්දියාවේ සෞඛ්‍ය ෆෙඩරල් සෞඛ්‍ය ලේකම් රාජේෂ් භූෂාන් විසින් මාධ්‍ය වෙත අදහස් දක්වමින් පවසා සිටියේ එම ප්‍රාන්තයන් පුරාවට කොවිඩ්-19 රෝග ලක්ෂණ සහිත රෝගීන් සොයා ගැනීම සඳහා පරික්ෂණ වැඩි කරන ලෙස පවසා ඇති බවයි.
මෙලෙස පරික්ෂණ වැඩි කිරීමට හේතුව ලෙස දක්වා තිබුණේ ඩෙල්ටා වෛරසය විකෘති වීමෙන් සෑදුනු B.1.617.2.1 නැතිනම් AY.1 ලෙසින් හඳුන්වන නව ඩෙල්ටා ප්ලස් වෛරසය වේගයෙන් සම්ප්‍රේෂණය වීමේ ලක්ෂණ ඇති බවට අනාවරණය වීමයි.
මෙලෙස සොයාගත් රෝගීන් 22 දෙනාගෙන් 16 දෙනෙකුම ඉන්දියාවේ මහරාෂ්ට්‍ර ප්‍රාන්තයේ සිටි අය බවටද වාර්තා වෙනවා.
නව වෛරසය සම්ප්‍රේෂණය වීම වේගවත් වුවත් එය මාරාන්තිකද යන්න පිළිබඳව මෙතෙක් හෙළි වී නැහැ.
ඉන්දියාවේ රෝග පාලනය සඳහා වූ ජාතික මධ්‍යස්ථානය ඇතුළු ඉන්දියානු විද්‍යාඥයින් කණ්ඩායමක් විසින් මෑතකදී කොරෝනා ආසාදනය වීම් පිළිබඳව සමාලෝචනයක් කර තිබුණත් මෙම නව වෛරස් ප්‍රභේදය පිළිබඳව ඔවුන්ට කරුණු අනාවරණය වී තිබුණේ නැහැ. නමුත් ඔවුන් පසුව ඒ පිළිබඳව කරන ලද පරික්ෂණයකදී හෙළි වී තිබුණේ පසුගිය අපේ‍්‍රල් සහ මැයි මාසවලදී ඉන්දියාවේ දරුණු දෙවන ආසාදන රැල්ල ඉහළ යෑම සඳහා මෙම නව වෛරස් කාණ්ඩය හේතුවන්නට ඇති බවයි.
ඉන්දියාවට අමතරවය එක්සත් ජනපදය, එක්සත් රාජධානිය සහ ජපානය ඇතුළු රටවල් කිහිපයක ඩෙල්ටා ප්ලස් විකෘති වීම පිළිබඳව මේ වන විට තොරතුරු අනාවරණය වෙමින් තිබෙන බව වාර්තා වෙනවා
