අකුරැස්ස ප්‍රාදේශීය ලේකම් කොට්ඨාසයේ ඉහළ මලිදුව කනිටු විදුහලට ගමන් ගන්නා මාර්ගය ඉතා දුෂ්කර බැවින් ගම්වැසියන් ගණනාවකට සිය ජන වරම භාවිතා කිරීමට නොහැකි වී තිබෙනවා.
එහිදී ගම්වැසියන්ගේ දැනුවත් කිරීම මත ජනාධිපතිවරණය දා (21) එහි ගොස් එම සිදුවීම වාර්තා කිරීමට ගිය වාර්තාකරුවෙකු පෞද්ගලික පළිගැනීමක් මත පොලිස් භාරයට ගෙන තිබෙනවා.
ජන්ද මධ්‍යස්ථානයේ ඡායාරූප සහ වීඩියෝ ලබා ගත්තා යැයි පවසමින් අකුරැස්ස ප්‍රාදේශීය ලේකම්වරියගේ නියෝගයක් මත බංගම පොලිසිය විසින් මෙලෙස එම මාධ්‍යවේදියා පොලිස් භාරයට ගෙන තිබෙනවා.
වර්තමානය වන විට මෙම ඡන්ද මධ්‍යස්ථානය පිහිටි පාසල වැසී යාමේ තර්ජනයට මුහුන දී ඇති පාසලක් බවයි අප වාර්තාකරු සඳහන් කරන්නේ.
උස් කඳු මුදුනක පිහිටා ඇති මෙම පාසල දොළමාවත, පුවක්වත්ත ප්‍රධාන මාර්ගයේ සිට මීටර් 600ක් පමණ දුරින් පිහිටා ඇති බව සදහන්.
කෙසේවෙතත් ගම්වාසීන් පවසන්නේ පාසලට යනෙන මාර්ගය කොටසක් නාය යෑම නිසා දැඩි අවධානමක් දරා මෙම ජන්ද මධ්‍යස්ථානයට යෑමට සිදුවූ බවයි
එමෙන්ම නිලධාරීන්ගේ වරද හේතුවෙන් ගම්වාසීන් රැසකට තම ඡන්දය ලබාදීමේ අයිතිය අහිමි වූ බවයි ඔවුන් පෙන්වා දෙන්නේ.
වැඩිදුරටත් අදහස් දැක්වු ගම්වාසීන් පවසා ඇත්තේ, එම ගැටළුව වාර්තා කිරීමට පැමිණි මාධ්‍යවේදියා පමණක් නොව එය ප්‍රවෘත්ති ඔස්සේ රටම දැක බලාගැනීමට සැලැස්වූ මාධ්‍යවේදීන්ද අත්අඩංගුවට ගතයුතු බවයි.
