ජනපති අනුර ඉන්දීය සංචාරය අවසන් කර දිවයිනට (ඡායාරූප)

ජනාධිපති අනුර කුමාර දිසානායක මහතා තෙදින ඉන්දීය නිල සංචාරය අවසන් කර දිවයිනට පැමිණ තිබෙනවා.

ඊයේ (17) රාත්‍රියේ දී ජනාධිපතිවරයා කටුනායක ගුවන්තොටුපොළෙන් දිවයිනට පැමිණි බවයි ජනාධිපති මාධ්‍ය අංශය වාර්තා කළේ.

ජනාධිපතිවරයා සමග දූත මණ්ඩලයට එක් වූ කැබිනට් අමාත්‍ය මහාචාර්‍ය අනිල් ජයන්ත, විජිත හේරත් ඇතුළු පිරිස ද පැමිණ සිටියා.

ඊයේ රාත්‍රී 10.00 ට ඉන්දියාවේ නවදිල්ලි නුවර සිට ශ්‍රී ලන්කන් ගුවන් සේවයේ යූ.එල්.- 196 දරන ගුවන් යානයෙන් ජනාධිපතිවරයා ප්‍රමුඛ පිරිස රැගත් ගුවන් යානය කටුනායක ගුවන් තොටුපොළ වෙත පැමිණ තිබුණා.

ජනාධිපතිවරයා ජනපති ධුරයට පත් ව කළ පළමු විදෙස් සංචාරය ලෙසයි මෙය ඉතිහාසගත වන්නේ.

ජනාධිපතිවරයා ඉන්දියාවට ගිය අවස්ථාවේ දී ඉහළම අයුරින් එරට අග්‍රාමාත්‍ය නරේන්ද්‍ර මෝදි විසින් පිළිගනු ලැබූ අතර, පසුව සුහද සහ රාජ්‍ය තාන්ත්‍රික සාකච්ඡා ද පැවැත්වුණා.

ආර්ථික ගිවිසුමක් ලෙස සැලකෙන එට්කා ගිවිසුමට ද ජනාධිපතිවරයා මෝදි අගමැති සමග එකඟ වූ බවයි වාර්තා වූයේ.

මීට අමතර ව ඉන්දීය ජනාධිපතිනිය, ඉන්දීය ජාතික ආරක්ෂක උපදේශක, ඉන්දීය මුදල් අමාත්‍යවරිය, ඉන්දීය වෙළෙඳ ආයෝජකයින් ඇතුළු පිරිසක් ද ජනාධිපති අනුර කුමාර දිසානායක මහතා මුණගැසී දෙරට අතර ආර්ථික සංවර්ධනය සම්බන්ධයෙන් ද සාකච්ඡා කෙරුණා.