මෘදු, අවංක, යහපත් ගතිගුණවලින් මෙරට දේශපාලන නායකයින් තමන්ගේ ජීවිතය පුරවා ගත යුතු බව කොළඹ අතිඋතුම් මැල්කම් කාදිනල් රංජිත් හිමිපාණන් පවසනවා.
නිට්ටඹුව, තිහාරිය ප්‍රදේශයේ ඉදිකළ කතෝලික දේවස්ථානයක් විවෘත කිරීමේ අවස්ථාවට අද (01) එක්වෙමින් කාදිනල් හිමිපාණන් මේ බව සඳහන් කළා.
ජනාධිපති අනුර කුමාර දිසානායක ඊයේ (31) යාපනය ප්‍රදේශයේ සංචාරයක නිරත වූ අවස්ථාවේ; යාපනයේ ජනතාව ඔහුට දැක්වූ ආදරණීය පිළිගැනීම තමන් අගය කරන බව උන්වහන්සේ මෙහිදී අදහස් දක්වමින් වැඩිදුරටත් පැවසුවා.
එම අවස්ථාවේ දී ජනාධිපතිවරයා ඉතා නිහතමානීව එම ජනතාව අතරට ගොස් ඔවුන්ගේ මිතුරෙක් ලෙස එම ජනතාව සමඟ එක්වීම පිළිබඳව ද තමා තුළ පැහැදීමක් ඇති වූ බවයි කාදිනල් හිමිපාණන් සඳහන් කර සිටියේ.
නීති රීති තුළින් මිනිසුන් තලාපෙළා ඔවුන්ව පාලනය කරනවාට වඩා සහෝදරත්වය සහ සුහදත්වය වර්ධනයකර සියලුම ජාතීන් එකමුතු කිරීම පවතින විශාලතම අභියෝගය බවයි උන් වහන්සේ මෙහිදී පෙන්වා දුන්නේ.
ශ්‍රී ලාංකිකයින් ලෙස එකමුතු වී කටයුතු කිරීමට කාලය මේ වනවිට එළඹ ඇති බව සඳහන් කළ උන්වහසේ; ඒ එකමුතුවීමේ ආශාව ඊයේ (31) ජනාධිපතිවරයාගේ යාපනය සංචාරය තුළ දී දැකගැනීමට හැකිවූ බවයි කාදිනල් හිමිපාණන් මෙම අවස්ථාවේ දී අදහස් දක්වමින් වැඩිදුරටත් පවසා සිටියේ.
