නීති විරෝධි අයුරින් මැතිවරණ ප්‍රචාරණ සිදුකරමින් සිටිය දී අත්අඩංගුවට ගෙන අධිකරණයට ඉදිරිපත් කළ පුද්ගලයින් අටදෙනෙකුගෙන් රුපියල් ලක්ෂ 04ක දඩ මුදලක් අය කර ගන්නා ලෙස වවුනියාව මහේස්ත්‍රාත් අධිකරණය අද (11) නියෝග කළා.
ඕමන්ත පොලිසිය පැවසූවේ නීති විරෝධි අයුරින් මැතිවරණ ප්‍රචාරණයන් සිදුකළ බවට මැතිවරණ නිරීක්ෂණ සංවිධාන විසින් පොලිසිය වෙත සිදුකළ දැනුම්දීමක් මත මෙම පුද්ගලයින් අටදෙනා අත්අඩංගුවට ගත් බවයි.
ඉන් අනතුරුවයි ඔවුන් මෙලෙස වවුනියාව මහේස්ත්‍රාත් අධිකරණය හමුවට ඉදිරිපත් කර ඇත්තේ.
අත්අඩංගුවට ගත් සැකකරුවෙකුගෙන් රුපියල් 50,000 බැගින් සැකකරුවන් අටදෙනාගෙන් රුපියල් ලක්ෂක 04ක මුදලක් දඩ මුදල් වශයෙන් අයකර ගැනීමට එහි දී මහේස්ත්‍රාත් අධිකරණය නියෝග කර තිබෙනවා.
පසුගිය සමයේ දී ඕමන්ත පොලිස් බල ප්‍රදේශය තුළ නීති විරෝධි අයුරින් අලවා තිබූ ප්‍රචාරණ පෝස්ටර 6,000 කට වැඩි ප්‍රමාණයක් ඕමන්ත පොලිසිය විසින් ඉවත් කිරීමට කටයුතු කර තිබෙනවා.
මේ අතර ට්‍රාන්ස්ෆෙරන්සි මැතිවරණ නිරීක්ෂණ සංවිධානය විසින් මැතිවරණ සමයේ වවුනියාව දිස්ත්‍රික්කයේ නීති විරෝධී අයුරින් සිදුකරන මැතිවරණ ප්‍රචාරණ කටයුතු සම්බන්ධයෙන් සිදුකරන දැනුම්දීම්වලට සිය ස්තූතිය ට්‍රාන්ස්ෆෙරන්සි මැතිවරණ නිරීක්ෂණ සංවිධානය වෙත පුදකරන බව ද වවුනියාව දිස්ත්‍රික්කයේ පොලිස් නිලධාරීන් පවසනවා.
