චීනයේ නිල සංචාරයක නිරත වන ජනාධිපති අනුර කුමාර දිසානායක මහතා සහ එරට ජනාධිපති ෂී – ජින් – පිං මහතා අද (15) පස්වරුවේ හමුවීමට නියමිතව තිබෙනවා.
චීන මහජන ශාලාවේ දී චීන ජනාධිපතිවරයා ව මෙරට ජනාධිපතිවරයාට සම්මුඛ වීමට නියමිත ව බවයි ජනාධිපති මාධ්‍ය අංශය ඊයේ (14) නිවේදනය කළේ.
චීනයේ ඇරයුමක් මත සිව්දින නිල සංචාරයකට ජනාධිපති අනුර කුමාර දිසානායක මහතා එක්ව සිටිනවා.
ශ්‍රී ලංකා ජනාධිපතිවරයා සහ චීන ජනාධිපතිවරයා ද්විපාර්ශ්වික සාකච්ඡා පැවැත්වීමෙන් අනතුරුව අවබෝධතා ගිවිසුම් කිහිපයක් අත්සන් තැබීමට ද අපේක්ෂිතයි.
චීනය බලා මෙරට ජනාධිපතිවරයා පෙරේදා (13) රාත්‍රියේ දී කටුනායක ගුවන් තොටුපොළින් පිටත් ව ගිය අතර එරට වේලාවෙන් ඊයේ පෙරවරු 10.25ට පමණ බීජිං ගුවන්තොටුපොළ වෙත ළඟා වුණා.
චීන සාම්ප්‍රදායිකත්වයට මුල් තැන දෙමින් රාජ්‍ය නායකයෙකුට දෙන ඉහළම ගෞරව ආචාර සහ ආරක්ෂාව මධ්‍යයේ චීන නියෝජ්‍ය විදේශ අමාත්‍ය චෙන් ශියාඩොන් මහතා විසින් අනුර කුමාර දිසානායක මහතා ව එරට රජයෙන් පිළිගනු ලැබුවා.
