මානව හිමිකම් ක්රියාකාරිකයින් දෙදෙනෙකු වන ලලිත් වීරරාජ් සහ කුගන් මුර්ගානන්දන් යන අය අතුරුදන් වීමේ සිද්ධිය සම්බන්ධයෙන් සාක්ෂි දීම සඳහා ආරක්ෂක ලේකම්වරයා වශයෙන් කටයුතු කළ හිටපු ජනාධිපති ගෝඨාභය රාජපක්ෂට යාපනය මහේස්ත්රාත් අධිකරණය හමුවේ පෙනී සිටින ලෙස දන්වා නිකුත් කර තිබූ සිතාසිය බල රහිත කරමින් අභියාචනාධිකරණය විසින් දුන් තීන්දුවට එරෙහිව ගොනුකර තිබෙන අභියාචනා පෙත්සම ජුලි මස 30 වැනි දා සලකා බැලීම සඳහා කැඳවන ලෙස ශ්රේෂ්ඨාධිකරණය දින නියම කෙරුණා.
මෙම පෙත්සම අද (18) සෝභිත රාජකරුණා සහ සම්පත් විජේරත්න යන මහත්වරුන්ගේ සමන්විත ශ්රේෂ්ඨාධිකරණ විනිසුරු මඬුල්ල ඉදිරියේ කැඳවනු ලැබුවා.
ඉදිරිපත් වූ කරුණු සලකා බැලූ විනිසුරු මඬුල්ල සඳහන් කළේ මෙම පෙත්සම කරුණු තහවුරු කිරීම සඳහා ජූලි මස 30 වැනිදා කැඳවන ලෙසයි.
2011 වසරේ මානව හිමිකම් ක්රියාකාරිකයින් දෙදෙනෙකු වන ලලිත් වීරරාජ් සහ කුගන් මුර්ගානන්දන් අතුරුදන්වීම සම්බන්ධයෙන් යාපනය මහේස්ත්රාත් අධිකරණය හමුවේ පැවැත්වෙන නඩුකරයට අදාළව සාක්ෂි දීම සඳහා එවක ආරක්ෂක ලේකම්වරයා වශයෙන් කටයුතු කළ හිටපු ජනාධිපති ගෝඨාභය රාජපක්ෂට අධිකරණය හමුවේ පෙනී සිටින ලෙස දන්වා යාපනයේ මහේස්ත්රාත් අධිකරණය විසින් සිතාසි නිකුත් කර තිබුණා.
ආරක්ෂක හේතුන් මත තමන්ට යාපනය මහේස්ත්රාත් අධිකරණය හමුවේ පෙනී සිට සාක්ෂි දීමට අපහසු බවත් සඳහන් කරමින් ගෝඨාභය රාජපක්ෂ විසින් 2019 වසරේ අභියාචනාදීකරණයට පෙත්සමක් ඉදිරිපත් කළා.
එම පෙත්සම විභාග කළ අභියාචනාධිකරණය සාක්ෂි දීම සඳහා අධිකරණයේ පෙනී සිටින ලෙස දන්වා යාපනයේ මහේස්ත්රාත් අධිකරණය විසින් ගෝඨාභය රාජපක්ෂ වෙත නිකුත් කළ සිතාසිය බල රහිත කරමින් නියෝගයක් නිකුත් කල අතරින් අභියාචනාධිකරණයේ එම නියෝගය නීතියට පටහැනි බවට තීන්දුවක් ලබාදෙන්න ලෙස ඉල්ලා අතුරුදන් වූවන්ගේ ඥාතීන් විසින් මෙම අභියාචනා පෙත්සම ශ්රේෂ්ඨාධිකරණයට ඉදිරිපත් කර තිබෙනවා.
