ගුජරාට් හි අහමදාබාද් ගුවන්තොටුපොළ ආසන්නයට කඩා වැටුණු යානාවේ සිටි මගීන් 120 දෙනෙකු පමණ අවම වශයෙන් පිළිස්සුම් තුවාල ලබා ජීවිතක්ෂයට පත් ව තිබෙන බව ඉන්දීය මාධ්ය වාර්තා කරනවා.
‘ද හින්දුස්තාන් ටයිම්ස්’ පුවත් සේවය සිදු කරන සජීවී යාවත්කාලීන කිරීම් හි දැක්වෙන්නේ මගීන් 242 දෙදෙනකු රැගෙන ලන්ඩනය බලා පියාසැරිය ඇරඹූ මෙම ගුවන් යානයේ මියගිය පිරිස තවත් ඉහළ යා හැකි බවට පුරෝකථනය කර ඇති බවයි.
ගුජරාටයේ සර්දාර් වල්ලභභායි පටෙල් ගුවන්තොටුපළෙන් ගුවන්ගත වී මිනිත්තු පහකට පසු මෙම ගුවන් යානය කඩා වැටීමට ලක් වුණා.
ගුවන් යානය කඩා වැටීමත් සමග විශාල ගිනිජාලාවක් සමගින් එම ප්රදේශයේම ඝන කළු දුමාරයක් නිකුත් වෙමින් තිබෙන බව ද වාර්තා වනවා.
මෙම ඛේදනීය ගුවන් අනතුර ගැන ඉන්දීය අගමැති නරේන්ද්ර මෝදි විශේෂ X පණිවිඩයක් නිකුත් කරමින් සිය සංවේගය පළ කර තිබෙනවා.
ඉන්දීය අග්රාමාත්යවරයා සඳහන් කරන්නේ, සිවිල් ගුවන් සේවා අමාත්ය රාම් මෝහන් නායිදු තත්ත්වය තක්සේරු කිරීම සඳහා අහමදාබාද් වෙත යැවීමට කටයුතු කර ඇති බවයි.
මෙම ගුවන් අනතුර ගැන ඇසූ විගස තමන් දැඩි සේ කම්පාවට පත් වූ බව ද මෝදි අග්රාමාත්යවරයා සඳහන් කර තිබෙනවා.
එහි දැක්වෙන්නේ මෙසේයි;
“අහමදාබාද්හි ඛේදවාචකය අපව මවිතයට පත් කර ශෝකයට පත් කර ඇත. එය වචනවලින් කිව නොහැකි තරම් හද කම්පා කරවන සුළුය. මෙම දුක්ඛිත පැයේ දී, මගේ සිතුවිලි එයින් පීඩාවට පත් වූ සියලු දෙනා සමඟ ය. විපතට පත් වූවන්ට උපකාර කිරීමට කටයුතු කරන අමාත්යවරුන් සහ බලධාරීන් සමඟ අඛණ්ඩව මම සම්බන්ධ වී සිටිමි,” යනුවෙනි.
මූලාශ්ර – www.hindustantimes.com/ NDTV
