ජනාධිපති රනිල් වික්‍රමසිංහ හට කිසිසේත් ම ගුරු සේවය අත්‍යවශ්‍ය සේවාවක් කිරීමට ඉඩ නොදෙන බව ලංකා ගුරු සංගමයේ ලේකම් ජෝසප් ස්ටාලින් පවසනවා.
ඊයේ (27) දිනයේ දී ජනාධිපතිවරයා මල්වතු – අස්ගිරි මහ නාහිමිවරුන් බැහැ දුටු අවස්ථාවේ දී ප්‍රකාශ කළේ දිනපතා උදෑසන වරුවේ ගුරුවරු පාසලේ රැඳී සිටීම අනිවාර්යය බවත්; නැතහොත් දරුවන්ගේ අධ්‍යාපනික කටයුතු බිඳ වැටීමක් දිගින් දිගටම සිදු වුවහොත් ගුරු සේවය අත්‍යවශ්‍ය සේවාවක් කිරීමට තමන් කටයුතු කරන බවයි.
මෙම ප්‍රකාශයට විරෝධය පාමින් ස්ටාලින් සඳහන් කළේ; ජනාධිපතිවරයාගේ එම තීරණය ක්‍රියාත්මක කිරීමට ඉඩක් නොදෙන බවත්; දින දෙකකට පසුව අද දින සිට යළිත් පාසල් කටයුතු ක්‍රියාත්මක වන්නේ ජනපති හෝ ඇමති බන්දුලගේ කීමට නොවන බවයි.
පෙරේදා (26) දිනයේ දී කොළඹ කොටුවේ පැවති විරෝධතාවේ දී පොලිසියෙන් එල්ල කළ කඳුලු ගෑස් ප්‍රහාර හේතුවෙන් මේ වනවිට දෙදෙනකු තුවාල ලබා රෝහල්ගත කර ඇති අතර තවත් එක් අයෙකු බරපතළ තත්ත්වයක පසුවන බව ද සඳහන් කළා.
විරෝධතාවට එල්ල කළ ප්‍රහාරය හේතුවෙන් තමන් ඇතුළු ගුරු – විදුහල්පතිවරුන් දෙවැනි දිනටත් වෘත්තීය ක්‍රියාමාර්ගයේ සිටි බවයි හෙතෙම වැඩිදුරටත් සඳහන් කළේ.
රජය දුන් පොරොන්දු ඉටුකර නොමැති අතර; අවම වශයෙන් වැටුප් විෂමතා හෝ ඉවත් කර නොමැති බවයි ජෝසප් ස්ටාලින් පැවසුවේ.
එබැවින් ගුරු – විදුහල්පතිවරුන්ගේ වෘත්තීය ක්‍රියාමාර්ගය යුක්තිසහගත බවයි ලංකා ගුරු සංගමය පෙන්වාදෙන්නේ.
wpDiscuz
