එක්සත් ජාතීන්ගේ ආරක්ෂක කවුන්සිලය විසින් ගාසා තීරයේ සටන් විරාමයක් සඳහා ඉල්ලූ යෝජනාව සම්මත කරගෙන තිබෙනවා.
ඒ, අනුව සියලු ප්‍රාණ ඇපකරුවන් වහාම සහ කොන්දේසි විරහිතව නිදහස් කරන ලෙස ද එමඟින් හමාස් සංවිධානයෙන් ඉල්ලා ඇති බවයි විදෙස් මාධ්‍ය වාර්තා කළේ.
පසුගිය ඔක්තෝබර් මාසයේ ඊශ්‍රායලය හා ගාසා තීරයේ යුද්ධය ආරම්භ වීමෙන් පසු අසාර්ථක උත්සාහයන් කිහිපයකින් අනතුරුව ආරක්ෂක කවුන්සිලය සටන් විරාමයක් සම්මත කරගත් පළමු අවස්ථාව මෙයයි.
ඊයේ (25) ඉදිරිපත් වූ යෝජනාවට ඇමරිකාව ඡන්දය දීමෙන් වැළකී සිටි අතර, ඊට එරෙහිව ඇමරිකාව නිෂේධ බලය භාවිත නොකිරීම ද විශේෂත්වයක්.
එක්සත් ජනපදයේ මෙම පියවර, ගාසා තීරයේ ඊශ්‍රායල ප්‍රහාරය සම්බන්ධයෙන් එය සහ එහි මිත්‍ර ඊශ්‍රායලය අතර වැඩෙන විරසකයක් සංඥා කරන බවයි විදෙස් මාධ්‍ය වැඩිදුරටත් කරුණු වාර්තා කළේ.
මේ අතර සම්මත කරගත් යෝජනාවට එරෙහිව එක්සත් ජනපදය නිෂේධ බලය පාවිච්චි නොකිරීම සම්බන්ධයෙන් ඊශ්‍රායල අගමැති බෙන්ජමින් නෙතන්යාහුගේ කාර්යාලය කනස්සල්ල පළකර තිබෙනවා.
