ගාසා තීරයේ පිහිටි සිය කාර්යාලවලට ෂෙල් ප්රහාරවලින් හානි සිදු වී ඇති බව ජාත්යන්තර රතු කුරුස සංවිධානය පවසනවා.
ඔවුන් වැඩිදුරටත් පවසන්නේ එම පරිශ්රය අවට නවාතැන් ගෙන සිටි පුද්ගලයන් 22 දෙනෙකු ද මේ ප්රහාර හේතුවෙන් ජීවිතක්ෂයට පත්ව ඇති බවයි.
මේ අතර, පලස්තීන හමාස් පාලන අමාත්යාංශය ප්රකාශ කළේ ගාසා තීරයේ, රෆා නගරයෙන් පිටත අවතැන් වූ පලස්තීනුවන්ගේ කූඩාරම් කඳවුරුවලට ඊශ්රායල හමුදා ෂෙල් වෙඩි ප්රහාර එල්ල කිරීමෙන් අවම වශයෙන් පුද්ගලයින් 25 දෙනෙකු මියගොස්
තවත් 50 දෙනෙකු තුවාල ලබා ඇති බවයි.
නමුත්, ඊශ්රායල ආරක්ෂක බලකායේ ප්රකාශකයෙකු පැවසුවේ හමුදාව විසින් එවැනි ප්රහාරයක් සිදු කළ බවට කිසිදු ඇඟවීමක් නොමැති නමුත් එම සිද්ධිය සමාලෝචනයක් සිදු කරන බවයි.
මීට අතර, ලෙබනනයත් තවත් ගාසා තීරයක් වනු දැකීම, ලෝකයට දරාගත නොහැකි වනු ඇති බව එක්සත් ජාතීන්ගේ සංවිධානය පවසනවා.
ඊශ්රායලය සහ ලෙබනනයේ හිස්බුල්ලා සංවිධානය අතර හට ගනිමින් පවතින ගැටුම් සම්බන්ධයෙන් අදහස් දක්වමින් එක්සත් ජාතීන්ගේ සංවිධානයේ මහ ලේකම් අන්තෝනියෝ ගුටේරස් මේ ප්රකාශය සිදු කළා.
පසුගිය වසරේ ඔක්තෝම්බර් 07වනදා ආරම්භ වූ හමාස් ඊශ්රායල ගැටුම් ආරම්භයේ සිට ම ලෙබනනයේ හිස්බුල්ලා සංවිධානය සහ ඊශ්රායලය අතර වරින් වර ගැටුම් ඇතිවුණා.
පෙරේදා හිස්බුල්ලා නායක හසන් නස්රල්ලා ඊශ්රායලයට දැඩි අනතුරු ඇඟවීමක් කර තිබූ අතර, ඊශ්රායල ද පෙරළා පහර දෙන බවයි ප්රකාශ කළේ.
ඊශ්රායලය එල්ල කළ ප්රහාරවලින් දකුණු ලෙබනනයේ දස දහස් ගණනක පිරිසක් අවතැන් වී සිටිනවා.
