තීරුබදු නොගෙවා මෙරටට ආනයනය කරන ලද රුපියල් ලක්ෂ 07කට ආසන්න විදේශීය දුම්වැටි සමග පොලිස් නිලධාරියෙකුගේ හැඳුනුම්පතක් හා විවිධ පුද්ගලයින්ගේ හැඳුනුම්පත් සමග පුද්ගලයෙකු පොලිස් විශේෂ කාර්ය බලකායේ නිලධාරීන් විසින් අත්අඩංගුවට ගනු ලැබුවා.
බුද්ධි/විශේෂ මෙහෙයුම්/මත්ද්‍රව්‍ය නාශක හා සංවිධානාත්මක අපරාධ මර්දන ඒකකයේ නිලධාරීන් කණ්ඩායමක් තලංගම පොලිස් බල ප්‍රදේශයේ කන්දවත්තපාර, බත්තරමුල්ල ප්‍රදේශයේ පිහිටි ගරාජයක් තුළදියි මෙම සැකකාර භාණ්ඩ සොයාගෙන ඇත්තේ.
එහි දී තීරුබදු නොගෙවා මෙරටට ආනයනය කරන ලද විදේශ රටක නිෂ්පාදිත විවිධ වර්ගයේ දුම්වැටි 4,400ක් සන්තකයේ තබාගැනීමේ වරදට තලංගම දකුණ ප්‍රදේශයේ පදිංචි වයස අවුරුදු 49 ක පුද්ගලයකු අත්අඩංගුවට ගැනුණා.
අත්අඩංගුවට ගන්නා ලද සැකකරු පදිංචිව සිටි නිවස පරීක්ෂා කිරීමේදී පොලිස් නිලධාරියෙකුගේ හැඳුනුම්පතක් හා විවිධ පුද්ගලයින්ට අයත් ජාතික හැදුනුම්පත් 22ක් හා විවිධ පුද්ගලයින්ට අයත් රියදුරු බලපත්‍ර 06 ක් ද අත්අඩංගුවට ගෙන ඇති අතර වැඩිදුර විමර්ශන කටයුතු සඳහා සැකකරු තලංගම පොලිස් ස්ථානය වෙත භාර දී තිබෙනවා.
