එක්සත් ජනපදයේ කැපිටල් හිල් ඉදිරිපිට දහස් ගණනක් පලස්තීන හිතවාදීන් විරෝධතාවයේ නිරත වෙද්දී ඊශ්‍රායල අගමැති බෙන්ජමින් නෙතන්යාහු ඊයේ (24) කොංග්‍රසය ඇමතුවා.
එහිදී අග්‍රාමාත්‍යවරයා පැවසුවේ ඊශ්‍රායලයේ සතුරා ඇමෙරිකාවේ ද සතුරෙක් වන අතර තමන්ගේ ජයග්‍රහණය ඇමෙරිකාවේ ද ජයග්‍රහණයක් බවයි.
කැපිටල් හිල් අවට අසාමාන්‍ය ලෙස දැඩි ආරක්‍ෂාවක් යොදමින් නෙත්න්යාහු අග්‍රාමාත්‍යවරයා කොංග්‍රසය ඇමතීමට පෙර සිටම බලධාරීන් අවට මාර්ග ගමනාගමනය සඳහා වසා දැමූ බව විදෙස් මාධ්‍ය වාර්තා කළා.
ජාත්‍යන්තර අපරාධ අධිකරණයේ නඩු පවරන්නන් විසින් ඉල්ලා සිටින අත්අඩංගුවට ගැනීමේ වරෙන්තුවක් සම්බන්ධයෙන් ඊශ්‍රායල නායකයා අවශ්‍ය යුද අපරාධකරුවෙකු ලෙස ප්‍රකාශ කරන ලද බැනර් ප්‍රදර්ශනය කරමින් විරෝධතාකරුවන් හඬ නැගුවා.
පොලිස් නියෝග කඩ කරමින් ඉදිරියට යෑමට උත්සාහ කළ විරෝධතාකරුවන්ට ගම්මිරිස් දියර ප්‍රහාර ද එල්ල කර තිබෙනවා.
ගාසා තීරයේ යුද්ධයෙන් මියගිය අය සිහිපත් කිරීම සඳහා ඔවුන් පලස්තීන කොඩිවලින් එතූ මිනී පෙට්ටි 30කට ආසන්න ප්‍රමාණයක් එහි තබා තිබුණා.
සිව්වැනි වරට කොංග්‍රසයේ ඒකාබද්ධ සැසිවාරය ඇමතූ ඊශ්‍රායල නායකයාට බොහෝ රිපබ්ලිකන් දේශපාලඥයින්ගෙන් ලැබුණේැ බාධාකාරී ප්‍රතිචාරයක්.
ගාසා තීරයේ ඊශ්‍රායල ප්‍රහාරවලින් සිවිල් වැසියන් දහස් ගනනක් මුහුණ දී සිටින මානුෂීය අර්බුදය පිලිබඳ කලකිරීම ප්‍රකාශ කරමින් ඩිමොක්‍රටික් නීති සම්පාදකයින් 39 දෙනෙක් නෙතන්යාහුගේ කතාව වර්ජනය කළා.
පැයකට වැඩි කාලයක් කතා කරමින් නෙතන්යාහු ගාසාවේ යුද්ධය තම රටේ පැවැත්ම සඳහා වන සටනක් ලෙස අර්ථ ගැන්වූවා.
දශක ගණනාවක් පුරා ඊශ්‍රායලයට ත්‍යාගශීලී යුධ ආධාර ලබා දීම සම්බන්ධයෙන් ඔහු එක්සත් ජනපදයට ස්තුතිවන්ත වුණා.
ඔහු එක්සත් ජනපද මිලිටරි ආධාර ලබා දීම වේගවත් කරන්නැයි ඉල්ලා සිටි අතර, මෙය ගාසා තීරයේ යුද්ධය අවසන් කිරීමට සහ පුලුල් කලාපීය යුද්ධයක් වැලැක්වීමට උපකාරී වනු ඇතැයි සඳහන් කළා.
දෙවන ලෝක යුද්ධ සමයේදී බ්‍රිතාන්‍ය අගමැති වින්ස්ටන් චර්චිල් ඇමරිකානු ජනතාවට කළ ආයාචනය උපුටා දක්වමින් ඔහු මෙසේ පැවසුවා ”අපිට උපකරණ දෙන්න, අපි වැඩේ ඉවර කරන්නම්”.
