කිලිනොච්චිය – පෙරියකුලම් වැවට පැන පුද්ගලයෙකු ජීවිතක්ෂයට පත් ව තිබෙනවා.
මෙම ඛේදවාචකය සිදු ව ඇත්තේ ඊයේ (29) බවයි පොලිසිය පැවසුවේ.
පෙරියකුලම් වැව් බැම්මෙහි පිහිටි හින්දු කෝවිලේ දේව මෙහෙයක් පැවති අවස්ථාවේ අදාළ පුද්ගලයා එම ස්ථානයට පැමිණ තිබෙනවා.
පසුව කෝවිල් දේව මෙහෙයට ද මඳ වේලාවක් එක් ව සිටි ඔහු පසුව වැවෙන් දිය නෑමට යන බව පවසා වැවට පැන ඇති බවයි දසත ප්‍රාදේශීය වාර්තාකරු පැවසුවේ.
නමුත් දේව මෙහෙයට එක් ව සිටි පිරිස් පැමිණ අදාළ පුද්ගලයාව දියේ ගිලීමට ඉඩ නොදී බේරාගෙන තිබෙනවා.
නමුත් සුළු වේලාවකින් මෙම පුද්ගලයා යළිත් ගොස් වැවට පැන ඇති බවත් එහිදී ඔහු ගැඹුරු ජලයේ අතුරුදන් ව ඇති බවත් වාර්තා වනවා.
පසුව ප්‍රදේශවාසීන් නැවත වරක් එම පුද්ගලයා බේරා ගැනීමට උත්සහා ගත්ත ද ගොඩට ගන්නා විට ද හෙතෙම මියගොස් සිටි බවයි වාර්තා වන්නේ.
මෙලෙස මිය ගොස් ඇත්තේ කණ්ඩාවලෙයි – පෙරියකුලම් ප්‍රදේශයේ පදිංචි ගනේෂමූර්ති රමේෂ් නමැති තිදරු පියෙක්.
කිලිනොච්චිය පොලිසිය සිද්ධිය සම්බන්ධයෙන් වැඩිදුර විමර්ශන සිදු කරනවා.
