කෝවිඩ් රෝගීන් සඳහා වෙන් කර ඇති දැඩි සත්කාර සහ අධි සත්කාර ඇඳන් 70න් 63ක් මේ වනවිට සක්‍රීය ලෙස භාවිත කෙරෙන බව සෞඛ්‍ය අමාත්‍යාංශයේ නියෝජ්‍ය අධ්‍යක්‍ෂ, ජනරාල් (අධ්‍යාපන, පුහුණු හා පර්යේෂණ), විශේෂඥ වෛද්‍ය හේමන්ත හේරත් මහතා ප්‍රකාශ කළේය.
එසේම කෝවිඩ් රෝගීන් සඳහා මේ වනවිට වෙන් කර ඇති ඇඳන් ප්‍රමාණවත් නොවුණහොත් කෝවිඩ් රැල්ලක් පැවති පෙර අවස්ථාවේදී අනුගමනය කළ ක්‍රියාමාර්ගවලට අවතීර්ණ වන ලෙස සෞඛ්‍ය අමාත්‍යාංශය විසින් සියලු රෝහල් වෙත දන්වා ඇති බවද හෙතෙම පැවසීය.
සෞඛ්‍ය ප්‍රවර්ධන කාර්යාංශයේදී ඊයේ (26දා) පැවති කෝවිඩ් මාධ්‍ය හමුවට එක්වෙමින් මේ බව පැවසූ නියෝජ්‍ය අධ්‍යක්‍ෂ ජනරාල්වරයා වැඩිදුරටත් සඳහන් කර සිටියේ, මේ වනවටි වාර්තා වන රෝගීන් සඳහා රෝහල් පහසුකම් ප්‍රමාණවත් නොමැති බවට සිදු කෙරෙන ප්‍රකාශ අසත්‍ය වන බවයි.
එසේම මෙරට රෝහල් පද්ධතිය තුළ ප්‍රමාණවත් ඔක්සිජන් ධාරිතාවක් පවතින බවද හේමන්ත හේරත් මහතා වැඩිදුරටත් ප්‍රකාශ කළේය.
