ඉන්දීය සුපිරි පිතිකරු විරාට් කෝලි සහ ඇෆ්ගනිස්ථාන වේග පන්දුයවන ක්රීඩක නවීන් උල් හක් අතර පැවති විරසකය අවසන් වී ඇති ආකාරය ලෝක කුසලාන තරගාවලියේ පසුගිය දා නිමා වූ ඉන්දු – ඇෆ්ගනිස්ථාන තරගය අතර තුර දැකගත හැකි වුණා.
එහිදී තරගය අතර තුර ඔවුන් දෙදෙනා ඉතා මිත්රශීලීව එකිනෙකා වැළඳගන්නා ආකාරය දැකගැනීමට ලැබුණු අතර, මෙම සිදුවීම සම්බන්ධයෙන් බොහෝ දෙනෙකුගේ අවධානයට ලක්ව තිබුණා.
නිමා වූ 2023 අයි.පී.එල්. තරගාවලියෙන් රෝයල් චැලෙන්ජස් බැංගලෝර් සහ ලක්නව් සුපර් ජයට්ස් අතර තරගයක දී පිටියේ ඇති වූ කිසියම් සිදුවීමක් මත විරාට් කෝලි සහ නවීන් උල් හක් අතර මතභේදාත්මක තත්ත්වයක් හට ගත්තා.
තරගය අතර තුර ඇති වූ මෙම සිදුවීම තවත් උත්සන්න වුණේ තරගයෙන් පසු ලක්නව් පිළේ උපදේශක ලෙස කටයුතු කළ ගෞතම් ගම්භීර් ද ඊට මැදිහත්වීම හේතුවෙන්.
එහිදී කලක සිට කිසියම් අමනාපයකින් පෙළෙන කෝලි සහ ගම්භීර් අතර ද උණුසම් තත්ත්වයක් හට ගත්තා.
කෙසේ වෙතත් ඉන්දීය ප්රේක්ෂකයින් මෙම සිදුවීමෙන් පසු ඇෆ්ගනිස්ථාන වේග පන්දුයවන ක්රීඩක නවීන් උල් හක්ට සමාජ මාධ්ය ඔස්සේ දැඩිව පහරදෙන ආකාරය දැකගත හැකි වුණා.
පසුගිය දා අවසන් වූ ඉන්දු – ඇෆ්ගනිස්ථාන තරගයේ දී, පැවති විරසකය අවසන් කරමින් කෝලි සහ නවීන් උල් හක් සුහදව ක්රීඩාකරන අවස්ථාවේ දෛවයේ සරදමක් මෙන් තරගයේ විස්තර විචාරක කුටියේ විස්තර විචාරකයෙකු ලෙස ගෞතම් ගම්භීර් කටයුතු කළා.
එදා එම සිද්ධියට මැදි වූ ගාම්බීර් තරගයේ විස්තර විචාරයේදී පවසා සිටියේ මෙවැන්නක්.
“ඔබ සටන් කරන්නේ පිටියේ මිස පිටියෙන් පිටත නොවේ. සෑම ක්රීඩකයෙකුටම තම කණ්ඩායම වෙනුවෙන් සටන් කිරීමට, ගෞරවය සඳහා සටන් කිරීමට සහ ජයග්රහණය සඳහා සටන් කිරීමට අයිතියක් ඇත. ඔබ කුමන රටකට අයත් වුවත් ඔබ කෙතරම් දක්ෂ ක්රීඩකයෙක් ද යන්න වැදගත් නොවේ. හොඳම දේ තමයි විරාත් කෝලි සහ නවීන් උල් හක්, ඕවර අතරේ ඉන්නවා දැක්කම අපිට පේනවා සටන අවසන් වෙලා කියලා.”
