විදෙස් රටක සිට මෙරටට පැමිණි කාන්තාවක් රුපියල් කෝටි 10ක වටිනාකමක් සහිත අයිස් මත්ද්රව්ය (Methamphetamine) සමග අත්අඩංගුවට ගෙන තිබෙනවා.
දසත ගුවන් තොටුපොළ වාර්තාකරු පැවසුවේ මෙම සැකකාරිණිය තායිලන්තයේ සිට මැලේසියාවේ ක්වාලාලම්පූර් නුවර වෙත ගොස් එතැන් සිට සිංගප්පූරුවේ චෙන්ඩු ගුවන් තොටුපොළේ සිට ඊයේ (04) රාත්රී 11.55ට සිංගප්පූරු ගුවන් සේවයේ එස්.කිව්.- 468 දරන ගුවන් යානයෙන් කටුනායක ගුවන් තොටුපොළ වෙත පැමිණ ඇති බවයි.
මෙම සැකකාරිණිය ග්රීන් චැනල් නමැති හරිත මාවත ඔස්සේ පිටතට යාමට උත්සාහ කරමින් සිටියදී රේගු මත්ද්රව්ය පාලන අංශයේ නිලධාරීන් පිරිසක් විසින් අත්අඩංගුවට ගනු ලැබුවා.
ඇය 33 හැවිරිදි තායිලන්ත ජාතික කාන්තාවක්.
ඇය විසින් රැගෙන විත් තිබූ ගමන් මළු තුළ ආහාර අඩංගු ඇසුරුම්හි සඟවා මෙම අයිස් මත්ද්රව්ය කිලෝග්රෑම් 05ක ප්රමාණය අසුරා තිබූ බවයි නිරීක්ෂණය වී ඇත්තේ.
අත්අඩංගුවට ගත් ගුවන් මගී කාන්තාව පිළිබඳ වැඩිදුර විමර්ශන කටයුතු සඳහා කටුනායක ගුවන් තොටුපොළ පොලිස් මත්ද්රව්ය කාර්යාංශයේ නිලධාරීන් වෙත භාරදීමට පියවර ගැනුණා.
