කූඨ ලෙස සකස් කළ කසකස්තාන ගමන් බලපත්ර උපයෝගී කර ගෙන ශ්රී ලංකාවට ඇතුළු වීමට තැත් කළ ඇෆ්ගනිස්තාන ජාතිකයන් දෙදෙනෙකු අත්අඩංගුවට ගෙන යළි පිටුවහල් කිරීමට කටයුතු කර තිබෙනවා.
සැකකරුවන් අද (20) අලුයම කටුනායක ගුවන් තොටුපොළ ආගමන හා විගමන නිලධාරීන් විසිනුයි අත්අඩංගුවට ගනු ලැබුවේ.
සැකකාර ගුවන් මගීන් දෙදෙනා වයස අවුරුදු 21-23 වියෙහි පසුවන ඇෆ්ගනුන් බවයි පැවසෙන්නේ.
ඔවුන් අද දින අලුයම 03.29ට කුවේට් රාජ්යයේ සිට ජසීරා ගුවන් සේවයේ ජේ.- 9551 දරන ගුවන් යානයෙන් කටුනායක ගුවන් තොටුපොළ වෙත පැමිණ සිටියා.
ගුවන් තොටුපොළ වෙත පැමිණි මොවුන් දෙදෙනා සිය ආගමන කටයුතු නිශ්කාශනය කර ගැනීමට ආගමන විගමන දෙපාර්තමේන්තු කවුළුව වෙත පැමිණ සිය කසකස්තාන ගමන් බලපත්ර ඇතුළු අනෙකුත් ලියකියවිලි භාර දී තිබෙනවා.
එහිදී මොවුන් ඉදිරිපත් කළ එම ගමන් බලපත්ර පිළිබඳ ඇති වූ සැකය මත, මොවුන් දෙදෙනා සහ ඔවුන්ගේ ලියකියවිලි ප්රධාන ආගමන විගමන නිලධාරීවරයා මගින් කටුනායක ගුවන් තොටුපොළ තුළ පිහිටි දේශසීමා ආවේක්ෂණ ඒකකයේ නිලධාරීන් වෙත යොමු කර තිබෙනවා.
එහිදී සිදු කළ තාක්ෂණික පරීක්ෂා කිරීම්වල දී මෙම කසකස්තාන ගමන් බලපත්රවල ජීව දත්ත පිටු සූක්ෂ්ම ලෙස වෙනස් කර, කූඨ ලෙස ගමන් බලපත්ර සකස් කර ඇති බව තහවුරු වී ඇතැයි සඳහන්.
ඉන්පසුව මොවුන්ගේ ගමන් මළු පරීක්ෂා කිරීමේ දී ඒවා තුළ තිබී මොවුන්ගේ සත්ය ඇෆ්ගනිස්තාන ගමන් බලපත්ර දෙක සොයා ගැනීමට හැකි වී තිබෙනවා.
පසුව මොවුන්ගෙන් මේ පිළිබඳ වැඩිදුර තොරතුරු විමසීමක් සිදු කර තිබූ අතර, එහිදී ශ්රී ලංකාව තුළ සංචාරය කිරීමට හෝ වෙනත් රටක් වෙත පලා යෑමේ සැළසුමක් මොවුන් සතුව තිබී නොමැති බවයි අනාවරණය වී ඇත්තේ.
ඒ අනුව මොවුන් මෙරට පදිංචි වීම සඳහා මෙරටට පැමිණ ඇති බව ගම්ය වන බැවින් මොවුන් දෙදෙනා ආපසු ඔවුන් පැමිණි කුවේට් රාජ්යය වෙත පිටුවහල් කිරීමට ජසීරා ගුවන් සේවයේ නිලධාරීන් වෙත භාරදීමට පියවර ගැනුණා.
