ශ්‍රී ලංකා කාන්තා වයස අවුරුදු 19 පහළ ක්‍රිකට් කණ්ඩායම නවසීලන්තය පරාජයට පත් කිරීමට සමත් වුණා.
ඒ අද (01) පැවති තරගයෙන් ලකුණු 55ක විශිෂ්ට ජයක් වාර්තා කරමින්.
මෙම තරගාවලිය ඔස්ට්‍රෙලියාව සත්කාරකත්වය දරන, ශ්‍රී ලංකාව සහ නවසීලන්තය එක් වන තුන්කොන් ක්‍රිකට් තරගාවලියක්.
ශ්‍රී ලංකාව සහභාගී වූ පළමු තරගය මෙය වන අතර එම තරගයේ කාසියේ වාසිය දිනා ගන්නට ශ්‍රී ලංකා (වයස අවුරුදු 19න් පහළ) කණ්ඩායම් නායිකා මනුදි නානායක්කාර සමත් වූ අතර ඇය තීරණය කළේ පළමු ව පිතිකරණය තෝරා ගැනීමටයි.
එහිදී පන්දුවාර 42ක් අවසානයේ ශ්‍රී ලංකා කාන්තා කණ්ඩායම සියලු දෙනා දැවී ලකුණු 159ක් ලබා ගත්තා.
ශ්‍රී ලංකා කණ්ඩායම වෙනුවෙන් සුමුදු නිසංසලා ලකුණු 34ක්, විමොක්ෂා බාලසූරිය සහ රශ්මිකා සෙව්වන්දි ලකුණු 29 බැගින් ලබා ගැනීමට සමත් වුණා.
කඩුලු බිඳ දැමීමේ දී නවසීලන්ත 19න් පහළ කාන්තා කණ්ඩායම වෙනුවෙන් Rishika Jaswal කඩුලු 03ක් ද, Louisa Kotkamp සහ Kate Irwin කඩුලු 02ක බැගින් ද බිඳ දැමුවා.
එක් කඩුල්ලක අයිතිය ලියා ගැනීමට සමත් වූයේ Tash Wakelin විසින්.
ඒ අනුව ජයග්‍රහණයට ලකුණු 160ක ඉලක්කයක් හඹා ගිය නවසීලන්ත කාන්තා 19න් පහළ කණ්ඩායමට සියලු දෙනා දැවී ලබාගත හැකි වූයේ ලකුණු 104ක් පමණයි.
ඒ පන්දුවාර 35කුත් පන්දු 02ක් අවසන් කරමින්.
ශ්‍රී ලංකා කාන්තා 19න් පහළ කණ්ඩායමේ පළමු ජය වෙනුවෙන් කඩුලු බිඳ දැමීමේ දී චමුදි ප්‍රබෝධා ලකුණු 24කට කඩුලු 04ක් ද, ලිමංසා තිලකරත්න ලකුණු 31කට කඩුලු 03ක් ද බිඳ හෙලීමට සමත් වුණා.
අසේනි තලගුණේ, ශෙහාරා ඉඳුවරී සහ රශ්මිකා සෙව්වන්දිට එක් කඩුල්ල බැගින් හිමි වුණා.
ඒ අනුව තුන්කොන් ක්‍රිකට් තරගාවලියේ ශ්‍රී ලංකා කණ්ඩායම සහභාගී වූ පළමු තරගය ජයගැනීමටයි ඔවුන් සමත් වූයේ.
තරගය පැවැත්වුණේ බ්‍රිස්බේන් හි Allan Pettigrew Oval ක්‍රීඩාංගණයේදීයි.
