අත්අඩංගුවට ගන්නා ගව සොරුන්ගේ ඡායාරූප සමාජ මාධ්‍ය ඔස්සේ ප්‍රචාරය කිරීමට පියවර ගන්නා ලෙස කෘෂිකර්ම අමාත්‍ය මහින්ද අමරවීර මහතා පොලිසියෙන් ඉල්ලිමක් කර තිබෙනවා.
මේ දිනවල කිරි ගවයින් සොරකම් කිරීමේ සිදුවීම් ඉහළ යමින් පවතින බවටයි ගොවි සංවිධානවල නියෝජිතයින් කෘෂිකර්ම අමාත්‍යාංශයට පැමිණිළි කර ඇත්තේ.
එබැවින් කිරි ගව සොරකම් වැළැක්වීම සම්බන්ධව සාකච්ඡාවක් කෘෂිකර්ම අමාත්‍යාංශයේ දී කැඳවා තිබුණා.
කෘෂිකර්ම අමාත්‍ය මහින්ද අමරවීර මහතාගේ ප්‍රධානත්වයෙන් පැවැති එම සාකච්ඡාවට පශු සම්පත් රාජ්‍ය අමාත්‍ය ඩී. බී. හේරත්, අමාත්‍යාංශයේ ලේකම් ගුනදාස සමරසිංහ සහ පොලිසියේ ඉහළ නිලධාරින් කිහිප දෙනෙක් ද සහභාගි වූ බවයි එම අමාත්‍යංශය ප්‍රකාශ කළේ.
සෑම දිනකම පාහේ එක් දිස්ත්‍රික්කයකින් අඩුම තරමින් කිරි ගව සොරකම් පහක් හෝ හයක් සම්බන්ධව පොලිස් ස්ථානවලට පැමිණිළි ලැබෙන බව පොලිස් නිලධාරින් මෙහිදී පෙන්වා දී තිබෙනවා.
ඇතැම් අවස්ථාවල ගව සොරුන් අත් අඩංගුවට ගන්නා අතර සොරුන් වැඩි පීරිසක් සුඛෝපභෝගී වාහන යොදා ගනිමින් කිරි ගවයින් සොරකම් කරන බවට හෙළිදරව් වී ඇති බවයි පොලිසිය ප්‍රකාශ කර ඇත්තේ.
කෘෂිකර්ම අමාත්‍යාංශයට ලැබී ඇති පැමිණිළි අනුව දිනකට කිරි ලීටර් 20ක් පමණ ලබා ගත හැකි ගව දෙනුන් මෙලෙස සොරකම් කරන බව සඳහන්.
අඩුම තරමින් එක් දිස්ත්‍රික්කයකින් සතියකට ගව දෙනුන් 35ක් පමණ සොරකම් කරන බවත් ගොවි නියෝජිතයින් අමාත්‍යාංශය දැනුම්වත් කර ඇති බව මෙහිදී අනාවරණ වුණා.
මෙහිදී අදහස් පළ කළ අමාත්‍ය මහින්ද අමරවීර මහතා කියාසිටියේ මීට දශක දෙක තුනකට පෙර ගව සොරුන්ට දැඩි දඬුවම් ලබා දීමට පොලිසිය කටයුතු කළ ද මේ වනවිට ඒවා ලිහිල් කර ඇත්නම් නැවතත් දඬුවම් ඉහළ නැංවීම සඳහා අවශ්‍ය යෝජනා ඉදීරිපත් කරන ලෙසටයි.
එමෙන්ම අත්අඩංගුවට ගන්නා ගව සොරුන්ගේ ඡායාරූප සමාජ මාධ්‍ය ඔස්සේ ප්‍රචාරය කිරීමට පියවර ගන්නා ලෙස ද අමාත්‍යවරයා ශ්‍රී ලංකා පොලිසියෙන් ඉල්ලීමක් කර තිබෙනවා.
මේ වනවිට ඇතැම් දිස්ත්‍රික්කවල පිහිටි ගවගාල්වල CCTV කැමරා පවා සවි කර තිබෙන අතර ඇතැම් ගවගාල්වල දම්වැල් යොදා ඉබි යතුරු දමා ගවයින් ආරක්ෂා කර ගන්නා තරමට කිරි ගව සොරකම ඉහළ ගොස් ඇති බව මෙහිදී ප්‍රකාශ කෙරුණා.
සොරකම් කරන මෙම සතුන් මස් සඳහා අලෙවි කරන බැවින් අනාගතයේ දී කිරි නිෂ්පාදනයේ ගැටලු සහගත තත්ත්වයක් පවා ඇතිවීමට ඉඩ ඇති බවත් පශු අංශ අවධාරණය කර තිබෙනවා.
