රජය විසින් ක්‍රියාත්මක ක්ලීන් ශ්‍රී ලංකා වැඩසටහන පිළිබඳ දැනුවත් කිරීමේ වැඩසටහනක් ආරක්ෂක ලේකම් විශ්‍රාමික එයාර් වයිස් මාර්ෂල් සම්පත් තුයියකොන්තාගේ ප්‍රධානත්වයෙන් පැවැත් වුණා.
අමාත්‍යාංශයේ ජ්‍යෙෂ්ඨ නිලධාරීන් සහ ත්‍රිවිධ හමුදා නිලධාරීන් ඇතුළු ආරක්ෂක අමාත්‍යාංශය යටතේ ඇති අනෙකුත් ආයතන ප්‍රධානීන් සමඟ මෙම සාකච්ඡාව ඊයේ (07) පැවැත් වුණේ අමාත්‍යාංශ ශ්‍රවණාගාරයේදීයි.
මින් පෙර පවත්වන ලද හඳුන්වාදීමේ සාකච්ඡාවකින් පසු පවත්වන ලද මෙම සාකච්ඡාවේ දී ආයතන ප්‍රධානීන් තවදුරටත් දැනුවත් කිරීම සහ මෙම වැඩසටහන සමාජයට ඵලදායී ලෙස ක්‍රියාත්මක කළ හැකි ආකාරය පිළිබඳ ක්‍රියාමාර්ග හා ක්‍රමෝපායන් සබැඳිව මෙහිදී අවධානය යොමු වුණා.
සමාජීය, පාරිසරික සහ සදාචාරාත්මක පුනර්ජීවනය තුළින් සමාජය උසස් තලයකට ගෙන ඒම අරමුණු කරගත් මෙම වැඩසටහන පිළිබඳ දැනුවත් කිරීම සඳහා ජනාධිපති ලේකම් කාර්යාලයේ ජ්‍යෙෂ්ඨ අතිරේක ලේකම් කපිල බණ්ඩාර ද එක්ව සිටියා.
මෙහිදී සමාජීය වශයෙන් මෙම සංකල්පය ක්‍රියාවට නැංවීම සඳහා ආරක්ෂක අමාත්‍යාංශයේ කාර්යභාරය ඉටු කරන්නේ කෙසේද යන්න මෙන්ම, මෙම වැඩසටහනෙහි අරමුණු සාක්ෂාත් කර ගැනීම සඳහා ක්‍රියාකාරී මැදිහත්වීම සහ සාමාන්‍ය ජනතාවගේ සහයෝගය අත්‍යවශ්‍ය වන බැවින්, අපේක්‍ෂිත ප්‍රතිඵල වඩාත් හොඳින් ලබාගත හැකි ආකාරය පිළිබඳව ත්‍රිවිධ හමුදාපතිවරුන්, අමාත්‍යංශයේ ජ්‍යෙෂ්ඨ නිලධාරීන් එක්ව ඵලදායී සාකච්ඡාවක නිරත වුණා.
