සන්හිල් අධිපති ‘ක්ලබ් වසන්ත’ නොහොත් සුරේන්ද්‍ර වසන්ත පෙරේරා ඝාතනයට සහාය දක්වමින්, වෙඩික්කරුවන්ට පලා යාමට උදව් කළ වෑන් රථයේ රියදුරු සහ බස් රථයේ රියදුරු රක්ෂිත බන්ධනාගාරගත කිරීමට නියෝග කර තිබෙනවා.
අද (24) දහවල් මෙම සැකකරුවන් දෙදෙනා කඩුවෙල මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුවයි විනිසුරුවරයා විසින් අදාළ නියෝගය නිකුත් කරනු ලැබුවේ.
මෙම සැකකරුවන් දෙදෙනා ඊයේ (23) රාත්‍රී කාලයේ දී බස්නාහිර පළාත භාර පොලිස් කොට්ඨාසයෙන් අදාළ ඝාතනය සම්බන්ධයෙන් මෙහෙයුම් සඳහා යොදවනු ලැබූ විශේෂ පොලිස් කණ්ඩායමක් විසින් බත්තරමුල්ල සහ අතුරුගිරියේ දී මොවුන් ව අත්අඩංගුවට ගනු ලැබුවා.
ඒ අනුව මෙම සැකකරුවන් දෙදෙනා ව අගෝස්තු මස 05 තෙක් රක්ෂිත බන්ධනාගාරගත කර තැබෙනු ඇති.
මීට අමතරව ක්ලබ් වසන්ත ඝාතනයට අත්අඩංගුවට ගත් ටැටූ හලේ හිමිකරු ඇතුළු සෙසු සැකකරුවන් 07 දෙනා ද එළඹෙන අගෝස්තු මස 05 වැනි දින තෙක් රක්ෂිත බන්ධනාගාරගත කර තැබීමටයි අධිකරණයෙන් මීට පෙර නියෝග හිමිවූයේ.
පසුගිය 08 වැනි දා උදෑසන 10ට පමණ අතුරුගිරියේ ටැටූ හලක් විවෘත කිරීමට ක්ලබ් වසන්ත ඇතුළු ඔහුගේ සගයින් පිරිසක් එක් වූ අතර; එහිදී නාඳුනන තුවක්කුකරුවන් දෙදෙනකු එල්ල කළ වෙඩි පහරින් ක්ලබ් වසන්ත සහ නයන වාසුල නමැත්තෙකු ජීවිතක්ෂයට පත් වුණා.
එමෙන්ම මෙරට ජනප්‍රිය ගායිකාවක් වන කේ. සුජීවා, ටැටූ හලේ හිමිකරුගේ බිරිඳ සහ ක්ලබ් වසන්තගේ බිරිඳ ද බරපතළ තුවාල ලබා රෝහල්ගත කෙරුණා.
මෙම ඝාතනය මේ වනවිට ප්‍රංශයේ සැඟවී සිටින පාතාල කල්ලි නායක කංජි පානි ඉම් රාන්ගේ සහ ඩුබායි හි රැඳී සිටින ලොකු පැටීගේ ආධාර හා උපදෙස් මත සිදු වූ පෞද්ගලික ආරවුලක් මත සිදු වූවක් බවටයි හෙළි ව ඇත්තේ.
