කෝලාහන ප්‍රදේශයේ කාන්තාවක් අද (26) පෙරවරුවේ කිඹුලෙකුගේ ඩැහැ ගැනීමකට ලක් ව තිබෙනවා.
දසත ප්‍රාදේශීය වාර්තාකරු පැවසුවේ; මරණකාරිය පෙරවරුවේ වළං සේදීම සඳහා නිවස ආසන්නයෙන් ගලා බසිනා කළු ගඟේ කොටසකට ගොස් ඇති බවයි.
වළං සෝදමින් සිටින අතරතුර දී කිඹුලා දිය යටින් මතු වී මෙම කාන්තාව ගැඹුරු දියට රැගෙන ගොස් තිබෙනවා.
එම අවස්ථාවේ දී කාන්තාව කෑ ගසා ඇති අතර ඇයගේ ස්වාමියා ඇතුළු ප්‍රදේශවාසීන් ක්‍රියාත්මක වී බෝට්ටුවකින් කිඹුලා ගිය දෙසට ගමන් කළ ද කිඹුලා කිහිපවරක් දිය යට සැඟ ව ගොස් ඇති බවයි පැවසෙන්නේ.
පසුව කඩිනමින් ගොඩබිම සිටි පිරිස ප්‍රදේශයේ නාවික හමුදාවට දැනුවත් කර ඇති අතර ඔවුන් පැමිණ මෙහෙ‍යුම් ආරම්භ කර තිබෙනවා.
කිඹුලා විසින් කාන්තාව මුදා හැර තිබියදී සිරුර සොයාගැනුණ ද ඒ වනවිටත් ඇය මියගොස් සිටි බවයි වාර්තා වන්නේ.
මෙසේ මියගොස් ඇත්තේ 52 හැවිරිදි කළුතර – කොහොලාන ප්‍රදේශයේ පදිංචි නිලන්ති මංගලිකා නමැති විවාහක කාන්තාවක්.
මරණ පරීක්ෂණය සඳහා මෘත ශරීරය නාගොඩ ශික්ෂණ රෝහලට ගෙන තිබෙනවා.
