කටාර් පුණ්‍යායතනය (Qatar Charity) සිය කාර්යාලය යළිත් ශ්‍රී ලංකාවේ විවෘත කර තිබෙනවා.
ඒ එම ආයතනයට ශ්‍රී ලංකාව තුළ පනවා තිබූ තහනම පසුගිය වසරේ ඉවත් කිරීමෙන් අනතුරුවයි.
කටාර් පුණ්‍යායතනය කටාර් රජයේ ප්‍රධාන පුණ්‍යායතනයක් වන අතර එය ශ්‍රී ලංකාව තුළ තහනම් කරන ලද්දේ හිටපු අමාත්‍ය සරත් වීරසේකර විසින් එල්ල කරන ලද චෝදනා මත යි.
ශ්‍රී ලංකාව ‘කටාර් පුණ්‍යායතනය’ ත්‍රස්තවාදී ආයතනයක් ලෙස නම් කර තිබූ අතර නීතිඥ හිජාස් හිස්බුල්ලාගේ නඩුවට අදාළව ත්‍රස්තවාදයට සම්බන්ධ ක්‍රියාකාරකම් සඳහා අරමුදල් සපයන බවට පුණ්‍යායතනයට චෝදනා කර තිබුණා.
පසුව බලශක්ති අමාත්‍ය කංචන විජේසේකර කටාර් රාජ්‍යයේ නිලධාරීන් හමුවූ අවස්ථාවේදී යි අදාළ එම තහනම ඉවත් කරනු ලැබුවේ.
අද එම කාර්යාලය යළි විවෘත කිරීමේ අවස්ථාවේදී, කටාර් පුණ්‍යායතනය විසින් 2023 වසර සඳහා ඇමරිකානු ඩොලර් මිලියන 11.7ක් වටිනා මානුෂීය ආධාර ලබාදීමට ද පියවර ගෙන තිබෙනවා.
එම මුදල් රජයේ අවශ්‍යතා අනුව හඳුනාගත් ප්‍රදේශ සඳහා වෙන් කරනු ඇති.
කටාර් පුන්‍යායතනය නැවත විවෘත කිරීමේ අවස්ථාවට එක්වෙමින් විදේශ අමාත්‍ය අලි සබ්රි ප්‍රකාශකර ඇත්තේ ශ්‍රී ලංකාවේ පීඩාවට පත්වූවන් වෙනුවෙන් සහාය වීමට කටයුතු කිරීම පිළිබඳ ආයතනයට ස්තූතිවන්ත වන බවයි.
ට්විටර් සටහනක් තබමින් ඔහු මේබව ප්‍රකාශයට පත්කර තිබෙනවා.
