සංචාරක ඕස්ට්‍රේලියානු කාණ්ඩයම සහ ඉන්දියාව අතර පළමු ටෙස්ට් තරග දෙක පැවති ක්‍රීඩාංගණවල තණතීරු සම්බන්ධයෙන් පසුගිය දිනවල බොහෝ දෙනෙකු අතර කතා බහක් මතුව ආවා.
ඒ, දෙරට අතර පැවති පළමු සහ දෙවන ටෙස්ට් තරග දෙකම දින තුනක් තුළ අවසන් වීමත් සමඟයි.
එහිදී බොහෝ දෙනෙක් සඳහන් කළේ මෙම තරග දෙක සඳහා යොදාගත් නාග්පූර් සහ දිල්ලි තණතීරු ටෙස්ට් තරග සඳහා යෝග්‍ය නොවන බවයි.
කෙසේ වෙතත් අන්තර් ජාතික ක්‍රිකට් කවුන්සිලය විසින් මෙම තණතීරු දෙක සඳහා ‘සාමාන්‍ය’ ශ්‍රේණිගත කිරීමක් ලබා දී ඇති බවයි වාර්තා වන්නේ.
ඒ, එම තරග දෙකේදීම තරග තීරකවරයා ලෙස කටයුතු කළ සිම්බාබ්වේ ජාතික ඇන්ඩි පයික්‍රොෆ්ට් විසින් ලබාදුන් වර්තාවක් අනුවයි.
දෙරට අතර පැවති පළමු ටෙස්ට් තරග දෙක තුල දී තණතීරු දෙකම දඟ පන්දු යවන්නන්ගේ පාරාදීසයක් වූ අතර, එහිදී ඉන්දියාවේ රවීන්ද්‍ර ජඩේජා, රවිචන්ද්‍රන් අශ්වින් සහ ඕස්ට්‍රේලියාවේ නේතන් ලයන්, ටොඩ් මර්ෆි වැඩි දක්ෂතා දැක්වීමට සමත් වුණා.
රවීන්ද්‍ර ජඩේජා, රවිචන්ද්‍රන් අශ්වින්ගේ විශිෂ්ඨ පන්දු යැවීම හමුවේ දෙරට අතර පැවති පළමු ටෙස්ට් තරග දෙකම ජය ගන්නට ඉන්දියාවට හැකියාව ලැබුණා.
