කොවිඩ් එන්නත් කාඩ්පත අනිවාර්ය කෙරෙන පොදු ස්ථාන සම්බන්ධයෙන් ප්රකාශයට පත්කිරීම ඉදිරි දින කිහිපය තුළ සිදුකරන බව සෞඛ්ය අමාත්යාංශය පවසයි.
අප්රේල් මස 30 වනදා සිට ක්රියාත්මක වන පරිදි පොදු ස්ථාන සඳහා එන්නත් කාඩ්පත අනිවාර්ය කිරීම පිළිබඳව අතිවිශේෂ ගැසට් නිවේදනයක් පසුගියදා නිකුත් කළේය.
ඒ අනුව අදාළ ස්ථාන සම්බන්ධයෙන් නිසි බලධරයා වන සෞඛ්ය සේවා අධ්යක්ෂ ජනරාල්වරයා විසින් ඉදිරියේදී දැනුම් දීමට නියමිත බව නියෝජ්ය සෞඛ්ය සේවා අධ්යක්ෂ ජනරාල් විශේෂඥ වෛද්ය හේමන්ත හේරත් මහතා පැවසුවේය.
ඊට අදාළ සාකච්ඡා මේ වන විට සිදුවෙමින් පවතින අතර කොවිඩ් එන්නත් කාඩ්පත අනිවාර්ය කෙරෙන ස්ථාන සම්බන්ධයෙන් කොවිඩ් මර්දනය සඳහා වන තාක්ෂණික කමිටුව විසින් සළකා බලමින් සිටින බව සඳහන් ය.
පොදු ස්ථාන වෙත ප්රවේශ වීමේදී පූර්ණ එන්නත්කරණයට ලක්වූ බව සඳහන් එන්නත් කාඩ්පත ඉදිරිපත් කිරීම ඉදිරියේදී අනිවාර්ය වන බැවින් මෙතෙක් බූස්ටර් මාත්රාව ලබා නොගත් පුද්ගලයින් කඩිනමින් එය ලබා ගැනීම සඳහා යොමුවන ලෙස නියෝජ්ය සෞඛ්ය සේවා අධ්යක්ෂ ජනරාල් විශේෂඥ වෛද්ය හේමන්ත හේරත් මහතා දැනුම්දෙයි.
මේ වන විටත් මෙරට ඉලක්කගත ජනගහනයෙන් මාත්රා තුනම ලබා ගනිමින් පූර්ණ එන්නත්කරණයට ලක්ව ඇත්තේ 78 ලක්ෂයක පමණ පිරිසක් පමණයි.
