එක්ස්ප්‍රස් පර්ල් නෞකාව ගිනි ගැනීමේ සිද්ධියට අදාළ වන්දි වාර්තා අධිකරණයට ඉදිරිපත් කරන ලෙස සමුද්‍ර දූෂණ වැලැක්වීමේ අධිකාරිය වෙත නියෝගයක් නිකුත් කරන්නැයි ඉල්ලා ශ්‍රේෂ්ඨාධිකරණයට මෝසමක් ගොනු කර තිබෙනවා.
එය සලකා බැලීම සඳහා ලබන 24 වනදා කැදවන ලෙසටයි ශ්‍රේෂ්ඨාධිකරණය නියෝග කළේ.
පරිසර යුක්ති කේන්ද්‍රය විසින් ඉදිරිපත් කරන ලද මෙම මෝසම ප්‍රියන්ත ජයවර්ධන, කුමුදුනී වික්‍රමසිංහ සහ මහින්ද සමයවර්ධන යන මහත්ම මහත්මීන් ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ අද කැඳවනු ලැබුවා.
එහිදී පරිසර යුක්ති කේන්ද්‍රය වෙනුවෙන් පෙනී සිටි නීතිඥ රවීන්ද්‍රනාත් දාබරේ අධිකරණයට කරුණු දක්වමින් කියාසිටියේ එක්ස්ප්‍රස් පර්ල් නෞකාව ගිනිගැනීම සිද්ධිය සම්බන්ධයෙන් විමර්ශනය කර වන්දි පිළිබඳව නිගමනය කිරීම සඳහා සමුද්‍ර දූෂණ වැලැක්වීමේ අධිකාරිය විසින් විද්වත් කමිටුවක් පත් කෙරුණු බවයි.
අදාළ නෞකා අනතුර නිසා පරිසරයට ඇමරිකානු ඩොලර් බිලියන හයක පමණ පාඩුවක් සිදුවී ඇති බව එම කමිටුව විසින් නිර්දේශ කර තිබෙන බවත් නීතිඥවරයා පෙන්වා දුන්නා.
එම වාර්තාව අධිකරණයට ඉදිරිපත් කරන ලෙස සමුද්‍ර දූෂණ වැලැක්වීමේ අධිකාරිය වෙත නියෝගයක් නිකුත් කරන ලෙසට එම මෝසමින් ඉල්ලා තිබෙන බවයි නීතිඥවරයා අධිකරණයට කරුණු දක්වා සිටියේ.
එමෙන්ම අදාළ නෞකාවේ වන්දි සිද්ධියට අදාළව මේ වන විට අල්ලස් චෝදනා රැසක් ද එල්ල වී ඇති බැවින් ඒ පිළිබඳව විභාග කිරීම සඳහා ජනාධිපති කොමිසමක් පත් කරන ලෙස නියෝගයක් නිකුත් කරන මෙන් ද අදාළ මෝසම තුළින් ඉල්ලීම් කර ඇතැයි ඔහු සඳහන් කළා.
