සංචාරක එංගලන්ත කණ්ඩායම පරදවා පළමු එක්දින තරගයෙන් විශිෂ්ට ජයක් වාර්තා කරන්නට බටහිර ඉන්දීය කොදෙව් කණ්ඩායම සමත් වුණා.
දෙරට අතර තරග තුනකින් සමන්විත එක්දින තරගාවලිය ඊයේ (31) ආරම්භ වූ අතර ඇදහැලුණු අයහපත් වර්ෂාව හේතුවෙන් තරගයේ තීරණය ඩක්වත් ලුවිස් න්‍යායයට අනුවයි තීරණය කෙරුණේ.
තරගයේ කාසියේ වාසිය දිනූ කොදෙව්වන් පළමුව පන්දුවට පහරදීමට එංගලන්තයට ඇරයුම් කළා.
ඒ අනුව එංගලන්ත කණ්ඩායම සියලු ම දෙනා දැවී රැස් කළේ ලකුණු 209ක් පමණයි.
එංගලන්තය වෙනුවෙන් නායක ලියෑම් ලිවින්ග්ස්ටෝන් ලකුණු 48ක් සහ සෑම් කරන් ලකුණු 37ක් ලබා ගත්තා.
කඩුලු බිඳ හෙලීමේ දී ගුඩකෙෂ් මොටී ලකුණු 41කට කඩුලු 04ක් සහ කඩුලු 02ක බැගින් ජේඩ්න් සීල්ස්, අල්සාරි ජෝසප් සහ මැතිව් ෆෝඩ් බිඳ හෙලුවා.
ඉන් අනතුරුව සිය හඹා යෑම ආරම්භ කිරීමට කොදෙව්වන් උත්සාහ කළ ද ඇදහැලුණු අයහපත් කාලගුණ තත්ත්වය හේතුවෙන් පන්දුවාර 35කට තරගය සීමා වුණා.
ඒ අනුව කොදෙව්වන්ට ලකුණු 157ක ඉලක්කයක් හිමිකර දෙමින්.
කොදෙව්වන් පන්දුවාර 25කුත් පන්දු 05ක් අවසානයේ දී කඩුලු 02ක් දැවී ලකුණු 157ක් ලබාගෙන තරගය ජය ගත්තා.
එවින් ලුවිස් ලකුණු 94යි.
කඩුලු බිඳ දැමීමේ දී ලිවින්ග්ස්ටෝන් සහ අදිල් රෂීඩ් විසින් එක් කඩුල්ල බැගින් බිඳ හෙලුවා.
තරගයේ වීරයා සම්මානය ගුඩකෙෂ් මොටී දිනාගත්තා.
දෙරට අතර පැවැත්වෙන දෙවැනි එක්දින තරගය හෙට (02) පැවැත්වෙනු ඇති.
