උසස් පෙළ විභාගය පවතින කාල සීමාව තුළ විදුලිය විසන්ධි නොකරන ලෙසට සිදුකළ ඉල්ලීමට යහපත් ප්රතිචාර ලැබී ඇති බව විභාග කොමසාරිස් ජනරාල් අමිත් ජයසුන්දර පවසනවා.
මේ අතර 2022 වර්ෂයට අදාළ අ.පො.ස. උසස්පෙළ විභාගය ලබන 23 වනදා ආරම්භ කරන බවයි විභාග කොමසාරිස් ජනරාල්වරයා සඳහන් කළේ.
ඒ, සඳහා පාසල් අපේක්ෂකයින් 278,196ක් සහ පෞද්ගලික අපේක්ෂකයින් 53,513 දෙනෙකු අයදුම්කර ඇති බවයි ඔහු වැඩිදුරටත් ප්රකාශ කර සිටියේ.
දිවයින පුරා පිහිටි විභාග මධ්යස්ථාන 2200 කදී මෙවර අ.පො.ස. උසස්පෙළ විභාගය පැවැත්වෙනවා.
මේ අතර, විභාගය පවත්වන කාලය තුළ විභාගයට මුහුණ දෙන දරුවන්ට බාධාවක් නොවන අයුරින් කටයුතු කරන ලෙසට විභාග කොමසාරිස් ජනරාල්වරයා මහජනතාවට දැනුම් දෙනවා.
එමෙන්ම විභාගය පැවැත්වෙන කාලසීමාව තුළ මැතිවරණ ප්රචාරක කටයුතු වැලක්වීමට කටයුතු කරන ලෙසට විශේෂ සාකච්ඡාවක් සිදුකරමින් ඉල්ලීමට බලාපොරොත්තුවන බවයි ඔහු වැඩිදුරටත් පවසා සිටියේ.
විභාග ප්රවේශ පත් ලැබුණු පසු ඒවා පරීක්ෂාකර බලා ඒවායේ යම් වරදක් ඇත්නම් ලබන 18 වනදාට පෙර නිවැරදි කරගැනීමට ද අවස්ථාව සලසා දී ඇති බව ද දැනුම් දෙනවා.
