ජනාධිපති රනිල් වික්රමසිංහ මහතා සහ ඉරාන ජනාධිපති ආචාර්ය සෙයිඩ් ඊබ්රහිම් රයිසි මහතා (Seyyed Ebrahim Raisi) අතර නිල හමුව එක්සත් ජාතීන්ගේ මහ මණ්ඩල සැසිවාරයට සමගාමීව ඊයේ (20) නිව්යෝර්ක් නුවර දී සිදු වී තිබෙනවා.
ඉරානය සහ ශ්රී ලංකාව අතර පවතින දිගුකාලීන සහයෝගීතාව සහ වසර ගණනාවක් පුරා දෙරට විසින් එකිනෙකා වෙත ලබා දුන් අන්යෝන්ය සහයෝගය පිළිබඳව සිහිපත් කළ ජනාධිපති රනිල් වික්රමසිංහ මහතා පසුගිය ආර්ථික අර්බුදකාරී අවස්ථාවේදී ඉරානය ශ්රී ලංකාව ලබාදුන් සහාය පිළිබඳවද සිය කෘතඥතාව පළ කළා.
නව ප්රවේශයන් ඔස්සේ දෙරට අතර සහයෝගීතාව තවදුරටත් පුළුල් කරගත යුතු බව මෙහිදී පැවසූ ඉරාන ජනාධිපතිවරයා යෝජනා කළේ දෙරට අතර ආර්ථික සහයෝගීතාව පුළුල් කර ගැනීමේ ශක්තිමත් ප්රවේශයක් ලෙස ඒකාබද්ධ ආර්ථික කොමිසම කඩිනමින් පිහිටුවීමටයි.
විශේෂයෙන් ඉරානය සතු අතිනවීන කෘෂි තාක්ෂණ දැනුම මෙරට කෘෂිකර්මාන්තය සඳහා ලබා ගැනීමේ හැකියාව පිළිබඳව ද මෙහිදී අවධානය යොමු වූ අතර ඉදිරියේ දී ඒ පිළිබඳව ද සහයෝගයෙන් කටයුතු කිරීමට නායකයන් එකඟ වී තිබෙනවා.
ඉරානය සහ ශ්රී ලංකාව අතර කලාපීය සහයෝගීතාව වර්ධනය කර ගැනීමේ පුළුල් අවස්ථාවක් පවතින බවත්, ඉන්දියානු සාගර වටද්දර සංගමයට (IORA) අයත් සාමාජික රටවල් ද එයට ඇතුළත් කරගත යුතු බවටත් නායක දෙපළ මෙහිදි පිළිගෙන තිබෙනවා.
විදුලිබල හා බලශක්ති ක්ෂේත්රය වෙනුවෙන් විශේෂයෙන්ම උමා ඔය බහුකාර්ය සංවර්ධන ව්යාපෘතිය සම්බන්ධයෙන් ඉරානය විසින් ශ්රී ලංකාවට ලබාදෙන සහාය මෙහිදී අගය කළ ජනාධිපති රනිල් වික්රමසිංහ මහතා උමා ඔය බහුකාර්ය සංවර්ධන ව්යාපෘතිය විවෘත කිරීමේ අවස්ථාව වෙනුවෙන් ශ්රී ලංකාවට පැමිණෙන ලෙස කළ ආරාධනාව ද ඉරාන ජනාධිපතිවරයා විසින් පිළිගනු ලැබුවා.
එසේම එම සංචාරයට සමගාමීව දෙරට අතර ද්විපාර්ශ්වික සබඳතා තවදුරටත් වර්ධනය කර ගැනීමට ද නායකයන් දෙපළ මෙහිදී එකඟ වුණා.
