නිරිතදිග බෙංගාල බොක්ක ප්‍රදේශයේ පවතින ගැඹුරු පීඩන අවපාතය හේතුවෙන් ඉදිරි පැය 12 තීරණාත්මක වන බව කාලගුණ විද්‍යා දෙපාර්තමේන්තුව පවසනවා.
අද පෙරවරු 8.30 පමණ වන විට ත්‍රිකුණාමලයට කිලෝමීටර් 120ක් පමණ දුරින් නැගෙනහිර දෙසින් මෙම පීඩන අවපාතය වර්ධනය වෙමින් පැවති බවයි එම නිවේදනයේ දැක්වෙන්නේ.
මෙම පීඩන අවපාතය දිවයිනෙන් නැගෙනහිර වෙරළට ආසන්නව ගමන් කර ඉදිරි පැය 12ක කාලය තුළ සුළිකුණාටුවක් දක්වා වර්ධනය විය හැකි බවට කාලගුණ විද්‍යා දෙපාර්තමේන්තුව දැනුම්දී තිබෙනවා.
උතුරු, උතුරු මැද, නැගෙනහිර සහ වයඹ පළාත්වලට ඉතාමත් තද වැසි සමග සුළි සුළං බලාපොරොත්තු විය හැකි බවත්, එම තත්ත්වය ම මධ්‍යම, බස්නාහිර සහ වයඹ පළාත්වලත්, ත්‍රිකුණාමලය හා කෑගල්ල දිස්ත්‍රික්කවලත් විටින් විට ඇති වන වැසි තත්ත්වය සමග එය මිලිමීටර් 75ක අගය ඉක්මවා යා හැකි බවටයි තක්සේරු කර ඇත්තේ.
එමෙන්ම ඇතැම් ප්‍රදේශවලට එම වැසි තත්ත්වය මිලිමීටර් 150ක අගය දක්වා වර්ධනය විය හැකි බව ද වාර්තා වනවා.
මේ අතර ඇදහැලුණු වර්ෂාපතනය හේතුවෙන් දිවයින පුරා බොහෝ ප්‍රදේශවල ගංවතුර තත්ත්වයක් හටගෙන තිබෙනවා.
මේ හේතුවෙන් පවුල් දහස් ගණනින් අවතැන් වී ඇති බවයි වාර්තා වන්නේ.
අනුරාධපුර දිස්ත්‍රික්කය තුළ පවුල් 1862 ක පුද්ගලයන් 5976 දෙනෙකු ගංවතුර බලපෑමට ලක්ව ඇති බව දිස්ත්‍රික් ලේකම් රංජිත් විමලසූරිය මහතා පැවසුවා.
අනුරාධපුර දිස්ත්‍රික්කයේ ප්‍රාදේශීය ලේකම් කොට්ඨාස 17කට මෙලෙස අයහපත් කාලගුණයෙන් බලපෑම් එල්ල වී ඇති බවයි වාර්තා වන්නේ.
අර්ධ නිවාස හානි 11ක් ද එම ප්‍රදේශයෙන් වාර්තා වනවා.
මැදවච්චිය , හොරොව්පතාන , කහටගස්දිගිලිය සහ මහා විලච්චිය යන ප්‍රාදේශීය ලේකම් කොට්ඨාසවල පුද්ගලයන් 364 දෙනෙකු සුරක්ෂිත ස්ථානවල රඳවාලමින් ඔවුන්ට අවශ්‍ය ආහාරපාන ලබාදීමට කටයුතු කර ඇති බවත් නොච්චියාගම සහ රාජාංගනය යාය 18 පුද්ගලයන් 94 දෙනකු ද සුරක්ෂිත ස්ථානවල රඳවාලමින් අවශ්‍ය පහසුකම් ලබාදීමට කටයුතු කර ඇති බව ද දිස්ත්‍රික් ලේකම්වරයා වැඩිදුරටත් කියා සිටියා.
එමෙන්ම කලා වැව, රාජාංගණය, මහවැලි ගඟ, කැළණි ගඟ, කාසල්රී, විමලසුරේන්ද්‍ර, අංගමුව, දැදුරු ඔය, නිල්වලා ආදී ප්‍රධාන පෙළේ ගංගා සියල්ල ම මේ වනවිට වාන් දැමීම ආරම්භ කර තිබීමත් ඇතැම් වැව් වාන් දැමීමට ආසන්න මට්ටමේ පැවතීම ගැන ද තොරතුරු වාර්තා වනවා.
එබැවින් එම ගංගා, වැව් අවට පහත්බිම්වල වෙසෙන ජනතාව දැඩි විමසිල්ලෙන් කටයුතු කරන ලෙසයි කාලගුණ විද්‍යා දෙපාර්තමේන්තු ඉල්ලා සිටින්නේ.
