“ඇමරිකාවේ ස්වර්ණමය යුගය දැන් ඇරඹුනා” – ජනපති ධුරයේ දිවුරුම් දෙමින් ට්‍රම්ප් කියයි

ඇමරිකා එක්සත් ජනපදයේ 47 වන ජනාධිපතිවරයා ලෙස තේරීපත් වූ ඩොනල්ඩ් ට්‍රම්ප් එරට වේලාවෙන් ඊයේ (20) දහවල් ජනාධිපති ධුරයේ දිවුරුම් දුන්නා.

වොෂින්ටන් හි කැපිටල් වන් එරීනා ගොඩනැගිල්ලේ දී පැවති මෙම දිවුරුම්දීමේ උත්සවය අමෙරිකානු සම්ප්‍රදාය අනුව පැවැත් වුණා.

ඩොනල්ඩ් ට්‍රම්ප් දිවුරුම්දීමට පෙර උප ජනාධිපතිවරයා වශයෙන් ජේ. ඩී. වෑන්ස් දිවුරුම් දුන් බවයි විදෙස් මාධ්‍ය වාර්තා කළේ.

මෙම දිවුරුම් දීමේ අවස්ථාවට ට්‍රම්ප්ගේ ආධාරකරුවන්, කැබිනට් නාමයෝජනා ලැබූවන් සහ හිටපු ජනාධිපතිවරුන් සහභාගී වී සිටියා.

දිවුරුම් දීමෙන් අනතුරුව ජාතිය අමතමින් ඩොනල්ඩ් ට්‍රම්ප් ජනාධිපතිවරයා පැවසුවේ, ඇමරිකාවේ ස්වර්ණමය යුගය දැන් ආරම්භ වී ඇති බවයි.

ට්‍රම්ප් ජනාධිපතිවරයා සිය ධුරයේ වැඩ අරඹමින් විධායක ක්‍රියාමාර්ග කිහිපයකට අත්සන් තබා ඇති බව වාර්තා වනවා.

නිල වශයෙන් පත්වීමෙන් පැය කිහිපයකට පසු ඔහු අත්සන් කළ විධායක ක්‍රියාමාර්ග අතරට හිටපු ජනාධිපති ජෝ බයිඩන්ගේ ප්‍රතිපත්ති 78ක් අවලංගු කිරීම ද ඇතුළත්.

එමෙන්ම 2021 වසරේ ජනවාරි 06 වන දින කැපිටල් කෝලාහල සම්බන්ධයෙන් 1,500 දෙනෙකුට සමාව නිකුත් කරන බව ද ට්‍රම්ප් එහිදී සඳහන් කිරීම ද විශේෂත්වයක්.

.