ශ්රී ලංකාවට ඔබ්බෙන් වූ ජාත්යන්තර මුහුදේ දී ඇමරිකානු ප්රහාරයකට ලක්වූ ඉරාන යුද නෞකාවේ සිටි බවට විශ්වාස කෙරෙන පුද්ගලයින් 84 දෙනෙකුගේ මළ සිරුරු සොයාගත් බව ශ්රී ලංකා නාවික හමුදාව පවසනවා.
එම මළ සිරුරු ගාල්ල, කරාපිටිය ශික්ෂණ රෝහල වෙත රැගෙනවිත් ඇති බවයි නාවික හමුදාව සඳහන් කළේ.
අයිරිස් ඩෙනා නැමැති මෙම නෞකාව ඊයේ (04) ශ්රී ලංකාවේ සෙවීම් සහ මුදාගැනීමේ කලාපයට ආසන්න ජාත්යන්තර මුහුදේදී ප්රහාරයකට ලක්ව තිබුණා.
1979 ජාත්යන්තර සමුද්රීය සෙවීම් සහ මුදාගැනීමේ සම්මුතියට අනුව, එවැනි හදිසි අවස්ථා සඳහා සහාය වීමට ශ්රී ලංකාව ජාත්යන්තරව බැඳී සිටින අතර, සිද්ධිය සිදු වූ මුහුදු ප්රදේශයේ සෙවීම් සහ මුදාගැනීමේ මෙහෙයුම් සඳහා වගකීම දරණවා.
ඒ අනුව ඊයේ (05) පෙරවරුවේ නෞකාව ගිලෙමින් පවතින බවට ආපදා පණිවිඩය ලැබීමෙන් පසු, ශ්රී ලංකා නාවික හමුදාව ශ්රී ලංකා ගුවන් හමුදාවේ සහාය ඇතිව සෝදිසි සහ මුදාගැනීමේ මෙහෙයුම් වහාම ආරම්භ කළා.
රොයිටර් පුවත් සේවයට අනුව, නෞකාවේ ආසන්න වශයෙන් පුද්ගලයින් 180ක් සිටි බවයි වාර්තා වන්නේ.
මෙම නෞකාවේ සිටි අයගෙන් පුද්ගලයින් 32 දෙනෙකු බේරාගැනීමට ශ්රී ලංකා නාවික හමුදාව සමත් වුණා.
මේ අතර, ඊයේ සවස පෙන්ටගනයේ පැවති සාකච්ඡාවක් අමතමින් එක්සත් ජනපද යුද ලේකම් පීට් හෙග්සෙත් තහවුරු කළේ ටෝපිඩෝවක් භාවිත කරමින් ඉන්දියානු සාගරයේ ඉරාන යුද නෞකාව ගිල්වා දැමුවේ එක්සත් ජනපද සබ්මැරීනයක් බවයි.
එක්සත් ජනපද යුද ලේකම් පීට් හෙග්සෙත් පැවසුවේ එක්සත් ජනපදය ඉන්දියානු සාගරයේ “ජාත්යන්තර ජලයේ ආරක්ෂිත යැයි විශ්වාස කළ ඉරාන යුද නෞකාවක්” ලෙස විස්තර කළ දෙයක් ගිල්වා දැමූ බවයි.
