රජය විසින් පාර්ලිමේන්තුවට ඉදිරිපත් කර තිබෙන ආයුර්වේද සංශෝධන පනත් කෙටුම්පතට එරෙහිව ගොනු කර තිබූ පෙත්සම විභාගය අවසන් කළ ශ්‍රේෂ්ඨාධිකරණයෙහි තීන්දුව පාර්ලිමේන්තුවේ කතානායකවරයා වෙත දැනුම් දෙන බව ප්‍රකාශයට පත් කර තිබෙනවා.
පුරා දින තුනක් තිස්සේ අදාළ පෙත්සම් එස්. තුරෙයිරාජා, යසන්ත කෝදාගොඩ සහ ජනක් ද සිල්වා යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ යි විභාග කෙරුණේ.
අදාළ පනත් කෙටුම්පත අභියෝගයට ලක් කරමින් දේශීය වෛද්‍යවරු මෙන්ම ආයුර්වේද වෛද්‍යවරු විසින් පෙත්සම් 08ක් ඉදිරිපත් කර තිබුණා.
එම පෙත්සම්වල සඳහන් කර ඇත්තේ අදාළ පනත් කෙටුම්පතේ අන්තර්ගත වගන්තිවලින් ආණ්ඩුක්‍රම ව්‍යවස්ථාව මගින් සහතික කර තිබෙන මූලික මිනිස් අයිතිවාසිකම් උල්ලංඝනය වන බවයි.
ඒ අනුව අදාළ පනත් කෙටුම්පත සම්මත කරන්නේ නම් පාර්ලිමේන්තුවේ තුනෙන් දෙකක බහුතර ඡන්දයකින් සහ ජනමත විචාරණයකින් අනුමත විය යුතු බවට තීන්දුවක් ලබාදෙන ලෙසත් පෙත්සම්කරුවන් ශ්‍රේෂ්ඨාධිකරණයෙන් ඉල්ලා තිබුණා.
