අස්වැසුම සමාජ සුබසාධන ප්‍රතිලාභය ලබන පුද්ගලයින්ට එම සහනය 2025 මාර්තු මස 31 වනදා දක්වා දීර්ඝ කිරීමට අමාත්‍ය මණ්ඩලය තීරණය කළ බව ආණ්ඩු පක්ෂයේ ප්‍රධාන සංවිධායක අමාත්‍ය නලින්ද ජයතිස්ස අද (03) පාර්ලිමේන්තුවේ දී ප්‍රකාශ කළා.
සංක්‍රාන්ති සහන ලබන ලක්ෂ 04ක් වූ ප්‍රතිලාභීන්ට මෙම වසරේ දෙසැම්බර් 31 වනදා අවසන්වීමට තිබූ එම සහනය මෙලෙස දීර්ඝ කිරීමට තීරණය කළ බවයි අමාත්‍යවරයා සඳහන් කළේ.
එමෙන්ම දුප්පත් කාණ්ඩය යටතේ තවත් ලක්ෂ 08කට ලබාදුන් රුපියල් 8,500ක අස්වැසුම සහනය රුපියල් දසදහසක් දක්වා ඉහළ දැමීමට තීරණය කළ බවයි ඔහු වැඩිදුරටත් පැවසුවේ.
ඊට අමතව අන්ත දිළිඳු කාණ්ඩය ලක්ෂ 04ක පිරිසකට ලබාදුන් රුපියල් 15,000ක දීමනාව රුපියල් 17,500 දක්වා වැඩි කිරීමට ආණ්ඩුව කටයුතු කළ බවද අමාත්‍ය නලින්ද ජයතිස්ස පාර්ලිමේන්තුවේ සඳහන් කර සිටියා.
මාසික වැඩිහිටි දීමනාව, මාසික වකුගඩු රෝගී දීමනාව සහ ආබාධිත පුද්ගලයින්ට ලබාදෙන මාසික දීමනාව ද පවතින ප්‍රමාණයට වඩා ඉහළ දැමීමට අයවැය යෝජනාවක් ගෙන එන බව ද අද (03) පාර්ලිමේන්තුවේ අනාවරණය වුණා.
එමෙන්ම අස්වැසුම හිමි පවුල්වල පාසල් ළමුන් වෙනුවෙන් පාසල් පොත් මිල දී ගැනීමට රුපියල් 6,000ක දීමනාවක් ලබන වසරේ සිට ලබාදෙන බව ද අමාත්‍යවරයා සඳහන් කළා.
ඊට අමතරව දෙමව්පියන් අහිමි දරුවන්, මව හෝ පියා අහිමි දරුවන් සහ විශේෂ හේතු මත අසරණ භාවයට පත්ව ඇති දරුවන් සඳහා ද ලබන වසරේ සිට පාසල් පොත් මිල දී ගැනීමට රුපියල් 6,000ක දීමනාව ලබා දීමට ද තීරණය කර තිබෙනවා.
