ජනාධිපති රනිල් වික්රමසිංහ මහතා විසින් ලබන 8 වැනිදා ඉදිරිපත් කරනු ලබන ආණ්ඩුවේ ප්රතිපත්ති ප්රකාශය පිළිබඳ සභාව කල් තැබීමේ විවාදය ලබන 9 වැනි බ්රහස්පතින්දා සහ 10 වැනි සිකුරාදා දෙදින පැවැත්වීමට තීරණය වූ බව පාර්ලිමේන්තුවේ මහලේකම් ධම්මික දසනායක මහතා පවසනවා.
කථානායක මහින්ද යාපා අබේවර්ධන මහතාගේ ප්රධානත්වයෙන් අද (03) පස්වරුවේ පැවතී පක්ෂ නායක රැස්වීමේදී යි මේ බව තීරණය වී ඇත්තේ.
මේ අනුව ලබන 9 වැනි බ්රහස්පතින්දා පෙරවරු 9.30ට පාර්ලිමේන්තුව රැස්වන අතර සුබසාධක ප්රතිලාභ පනත යටතේ නියෝග සහ විවිධ රජයේ ව්යවස්ථාපිත ආයතනවල වාර්ෂික වාර්තාවලට අදාළව පසුගිය සභාවාරයේදී පාර්ලිමේන්තුවට යථාපරිදි ඉදිරිපත්කර තිබූ යෝජනා 51 ක් අනුමතිය සදහා ඉදිරිපත් කිරීමට ද මෙහිදී තීරණය වී තිබෙනවා.
අනතුරුව ජනාධිපතිවරයා විසින් ඉදිරිපත් කළ ආණ්ඩුවේ ප්රතිපත්ති ප්රකාශය පිළිබඳ සභාව කල් තැබීමේ විවාදය පස්වරු 5 දක්වා පැවැත්වෙනු ඇති.
ඉන්පසු පෙබරවාරි 10 වැනි සිකුරාදා පෙරවරු 9.30 සිට පස්වරු 5 දක්වා ආණ්ඩුවේ ප්රතිපත්ති ප්රකාශය පිළිබඳ සභාව කල් තැබීමේ විවාදය දෙවැනි දිනටත් පැවැත්වීමට ද මෙහිදී තීරණය වූ බවයි මහලේකම්වරයා ප්රකාශ කළේ.
අග්රාමාත්ය දිනේෂ් ගුණවර්ධන, නියෝජ්ය කථානායක අජිත් රාජපක්ෂ, සභානායක, අමාත්ය සුසිල් ප්රේමජයන්ත, ආණ්ඩු පාර්ශවයේ ප්රධාන සංවිධායක, අමාත්ය ප්රසන්න රණතුංග ඇතුළු පක්ෂ නායකයින් පිරිසක් මෙම අවස්ථාවට එක්ව සිටියා.
