අහුංගල්ල ප්‍රදේශයේ සිදු වූ වෙඩි තැබීමකට සම්බන්ධව අත්අඩංගුවට ගත් සැකකරුවකු ඝාතනය කිරීම සම්බන්ධයෙන් ඉදිරිපත් කළ ප්‍රතිශෝධන පෙත්සමක් නැවත බලපිටිය මහධිකරණයේ දී විභාගයට ගෙන තිබෙනවා.
දසත ප්‍රාදේශීය වාර්තාකරු පැවසුවේ; අහුංගල්ල ප්‍රදේශයේ දී 2022 වසරේ ඔක්තෝබර් 12 වැනි දින ත්‍රී රෝද රථ රියදුරෙකුට වෙඩි තැබීමේන් සිද්ධියක් සම්බන්ධයෙන් අත්අඩංගුවට ගත් සැකකරුවකු වන තණමල්විල පදිංචිකරුවකු වූ කටුවන ගම් ආචාරිගේ මහේෂ් ඉන්දික යන අය වෙඩි තබා ඝාතනය කිරීම සම්බන්ධ ව විශේෂ කාර්ය බළකායේ පොලිස් පරීක්ෂකවරයකුට එරෙහිව පවරා තිබූ නඩුව පසුගිය දෙසැම්බර් මස 10 වන දින විභාගයට ගැනීමෙන් අනතුරුව නීතිපතිවරයාගේ නිර්දේශ මත අපරාධ චෝදනා එල්ල කිරීම සඳහා සාක්ෂි නොමැති බැවින්, මෙම නඩුව පවත්වාගෙන යාම අවසන් කිරීමට බලපිටිය ඩී. ජානක මහතා විසින් තීන්දු කිරීමෙන් අනතුරුව නීතිපතිවරයාගේ නිර්දේශය නැවත ප්‍රතිශෝධනය කරන ලෙස ඉල්ලා මියගිය අයගේ පාර්ශ්වය විසින් බලපිටිය මහධිකරණය වෙත ඉල්ලීමක් කරන ලදුව ඒ සම්බන්ධයෙන් ඊයේ දින (25) මහාධිකරණයට කැඳවීමක් කරන ලදුව දෙපාර්ශ්වයම මහාධිකරණය හමුවේ පෙනී සිටියා.
රජයේ පාර්ශ්වය වෙනුවෙන් නියෝජ්‍ය සොලිසිටර් ජනරාල් ජනතා බණ්ඩාර මහතා පෙනී සිටි අතර අගතියට පත් පාර්ශ්වය වෙනුවෙන් ජනාධිපති නීතිඥ අනුර මැද්දගොඩ, නීතිඥ නදීෂා කන්නංගර සහ නීතිඥ බී. ප්‍රියංක යන නීතිඥ මඩුල්ල පෙනී සිටියා.
කරුණු සලකා බැලූ බලපිටිය මහාධිකරණ විනිසුරු ප්‍රියන්ත ලියනගේ මහතා එය ලබන 25 වන දින කැඳවන බව ප්‍රකාශ කළා.
මේ අවස්ථාවට මියගිය අයගේ අනියම් බිරිඳ වන නා ඔටුන්න පියුමි වත්සලා නමැත්තිය පැමිණ තිබූ අතර ඇයට වින්දිතයන් ආරක්ෂා කිරීමේ පනත යටතේ පොලිස් ආරක්ෂාව ද ලබා දී තිබුණා.
බලපිටිය මහාධිකරණ සංකීර්ණ ඉදිරිපිට විශේෂ කාර්ය බලකාය සහ පොලිසිය විසින් විශේෂ ආරක්ෂාවක් ලබාදීම ද සිදු කර තිබුණු බවයි දසත ප්‍රාදේශීය වාර්තාකරු පැවසුවේ.
