මහජනතාවගේ සෞඛ්ය පැවැත්මට හා ජීවිත අවදානමක් ඇති වන අයුරින් කැකිරාව සෞඛ්ය වෛද්ය බල ප්රදේශය තුළ ඇති පීඩාකාරී විය හැකි අවදානම් ගස් – අතු, පැරණි ගොඩනැගිලි හා තාප්ප ආදිය ඉවත් කරන ලෙස උපදෙස් ලබා දී තිබෙනවා.
කැකිරාව සෞඛ්ය වෛද්ය නිලධාරී කාර්යාලය මගින් ෙම ප්රදේශයේ ප්රාදේශීය සභාව ඇතුළු වගකිව යුතු ආයතන වෙත ලිඛිත දැනුම්දීමක් කර ඇති බවයි අප ප්රාදේශීය වාර්තාකරු කුෂාන් ජයවර්ධන පැවසුවේ.
කැකිරාව සෞඛ්ය වෛද්ය නිලධාරී අසිත කෝසල තනිප්පුලිආරච්චිගේ අත්සනින් යුතුව නිකුත් කර ඇති 2023-10-10 දිනැති ලිපිය මගින් අදාළ ලිඛිත දැනුම්දීම කර තිබෙනවා.
පසුගිය දිනවල ඇදහැලුණු අධික වර්ෂාව නිසා කොළඹ නගර සභා සීමාවේ දී බස් රථයක් මතට ගසක් කඩා වැටීමෙන් සිදු වූ ජීවිත හා සෞඛ්ය හානි සම්බන්ධයෙන් අවධානය යොමු කරමින් එවන් ශෝචනීය සිද්ධීන්ගෙන් ප්රදේශයේ මහජනතාව හා ඔවුන්ගේ සෞඛ්ය තත්ත්වයන් ආරක්ෂා කර ගැනීමේ අරමුණෙන් එම දැනුම්දීම කර ඇති බවත් එම ලිපියෙහි වැඩිදුරටත් සඳහන්.
මේ සම්බන්ධයෙන් අප ප්රාදේශීය වාර්තාකරු කැකිරාව සෞඛ්ය වෛද්ය නිලධාරී අසිත කෝසල තනිප්පුලිආරච්චිගෙන් කළ විමසීමක දී ඔහු සඳහන් කළේ; අශ්වයා පැන ගිය පසු ඉස්තාලය වසා තේරුමක් නොමැති බවත්, අවදානම් මට්ටමේ ඇති සියලු ගොඩනැගිලි, ගස් සහ ඒවායේ අතු ඉවත් කිරීමට අදාළ අංශ පියවර ගනු ඇතැයි තමන් බලාපොරොත්තු වන බවයි.
