තේ දළු නෙලන වතු කම්කරුවන්ට කුඩයක් හදුන්වාදීමට හොරණ වැවිලි සමාගම යටතේ පාලනය වන ස්ටොක්හොම් වතුයායේ පාලන අධිකාරිය පියවර ගෙන තිබෙනවා.
තේ කර්මාන්තයේ නියැලෙන වතු කම්කරුවන් අව්වෙන් සහ වැස්සෙන් පීඩාවට පත් නොවී පහසුවෙන් තේ දළු නෙලීම සඳහා මෙම කුඩය හදුන්වා දුන් බවයි වතු අධිකාරි නදීර ගුණසේකර සඳහන් කළේ.
එම වතු සමාගමේ ප්‍රධාන විධායක නිලධාරි ජේ.රොද්‍රිගෝ සහ සමාන්‍යාධිකාරි වසන්ත ගුණවර්ධනගේ සංකල්පයක් මත වතුයායේ තාක්ෂණ නිලධාරින් සමඟ එක්ව නියමු ව්‍යාපෘතියක් ලෙස මෙම කුඩය හදුන්වා දී තිබෙනවා.
වතු සමාගම විසින් තේ දළු නෙලන වතු කම්කරුවන්ට දැනටමත් සැහැල්ලු බටවලින් සකස් කරන ලද තේ කූඩයක් හදුන්වා දී ඇති අතර,ඊට සමගාමීව මෙම කූඩය හදුන්වා දීමටයි කටයුතු කර ඇත්තේ.
තේ කර්මාන්තය ආශ්‍රිත රැකියාවලින් ඉවත්වන වතු කම්කරුවන් තේ කර්මාන්තයේ රඳවා ගැනිමට සහ තේ කර්මාන්තය කාර්යක්ෂම කිරීමට හදුන්වාදී ඇති මෙම කූඩය රුපියල් 1,600 වැනි පිරිවැයක් දරමින් නිර්මාණය කර තිබෙනවා.
වතු කම්කරුවන්ට හදුන්වා දුන් කූඩය සඳහා පේටන් බලපත්‍රයක් ලබාගැනිමට ඉදිරියේ දී කටයුතු කරන බවයි වතු පාලන අධිකාරිය වැඩිදුරටත් සඳහන් කළේ.
