අවසන් මහ සටනට පිවිසීමට දකුණු අප්‍රිකාවට ඇෆ්ගනුන්ගෙන් පහසු ඉලක්කයක්

පන්දුවාර 20 ක්‍රිකට් ලෝක කුසලානයේ අවසන් පූර්ව වටයේ තරගය අද (27) ආරම්භ වූ අතර; තරගය ජයග්‍රහණය කිරීමට ප්‍රතිවාදී දකුණු අප්‍රිකානු කණ්ඩායමට ඇෆ්ගනිස්තානයෙන් ලකුණු 56ක පහසු ඉලක්කයක් හිමි වුණා.

අද තරගය Tarouba ක්‍රීඩාංගණයේ දී ආරම්භ වූයේ කාසියේ වාසියේ ජය ඇෆ්ගන් නායක රෂීඩ් ඛාන් හට හිමිකර දෙමින්.

ලෝක කුසලානයක කුළුදුල් අවසන් පූර්ව වටයට පිවිසීමේ සතුට ද පෙරදැරි කරගනිමින් ඇෆ්ගනිස්තාන පිතිකරුවන් පළමුවට පන්දුවට පහරදීම සුදුසු බවට ඇෆ්ගන් නායකයා තීරණය කළ අතර; ඒ වෙනුවෙන් පළමු කඩුල්ල සඳහා පිටියට පිවිසියේ ආරම්භක පිතිකරු යුගල වශයෙන් Rahmanullah Gurbaz සමගින් Ibrahim Zadran යි.

ප්‍රවේගකාරී පිතිකරුවන් යුගලක් ලෙස සැලකෙන ගුර්බාස් සහ සද්‍රාන් හට මෙවර පිත්තෙන් සාර්ථක වීමට නම් දකුණු අප්‍රිකානු පන්දු යවන්නන් කිසිසේත් ම ඉඩක් ලබා දුන්නේ නැහැ.

ඒ අනුව පළමු කඩුල්ල පළමු පන්දුවාරය තුළ ම බිඳ දමන්නට දකුණු අප්‍රිකානු වේග පන්දු ක්‍රීඩක ජැන්සෙන් සමත් වුණා.

දකුණු අප්‍රිකා පන්දු බලඇණිය ඇෆ්ගනුන්ගේ පිතිකරුවන් ආ සැණින් යළිත් ක්‍රීඩාගාරයේ ප්‍රේක්ෂකයින් බවට පත් කරන්නට ඔවුන්ට වැඩි වේලා ගත වූයේ නැහැ.

පන්දුවාර 03ක් වන විට ද ලකුණු 20කට ඇෆ්ගන් කණ්ඩායමේ කඩුලු 04ක් බිඳ වැටී තිබුණා.

Azmatullah Omarzai ට පමණක් කණ්ඩායම වෙනුවෙන් යාන්තමින් ලකුණු 10ක් එක් කිරීමට හැකි වුව ද, සෙසු කිසිදු ඇෆ්ගන් ක්‍රීඩකයෙකුට ලකුණු 10 සීමාව ඉක්මවා යන්නට නොහැකි වූයේ දකුණු අප්‍රිකානු පන්දු බලඇණිය හමුවේ ඔවුන්ගේ ලකුණු පුවරුව දූරකථන අංක ලෙසින් දිස් වූ හෙයින්.

දකුණු අප්‍රිකාව වෙනුවෙන් කඩුලු බිඳ හෙලීමේ දී විශිෂ්ට පන්දු යැවීමක නිරත වූ Tabraiz Shamsi ලකුණු 06කට කඩුලු 03ක් බිඳ දැමුවා.

මෙය ශම්සි ජාත්‍යන්තර පන්දුවාර 20 ක්‍රිකට් තරගයක දී ලබාගත් විශිෂ්ටතම පන්දු යැවීමයි.

මීට පෙර ඔහු ලකුණු 24කට කඩුලු 05ක් දවාගෙන තිබුණා.

Marco Jansen ලකුණු 16කට කඩුලු 03ක් ද, කඩුලු 02ක බැගින් Kagiso Rabada, Anrich Nortje නමින් ලියැවුණා.

ඒ අනුව ඇෆ්ගනිස්තාන කණ්ඩායම මෙවර ඔවුන් තරගාවලියේ ලැබූ අවම ලකුණු සංඛ්‍යාවට හිමිකම් කියමින් පන්දුවාර 11කුත් පන්දු 05ක් අවසානයේ දී සියලු දෙනා දැවී ලබා ගැනීමට සමත් වූයේ ලකුණු 56ක් පමණයි.

මෙම තරගය ජය ගැනීම දකුණු අප්‍රිකාවට පහසු ඉලක්කයක් ලෙස පෙනෙන අතර; ඒ සඳහා ඔවුන් හට පන්දු 120ක් හිමිව තිබෙන්නේ කඩුලු 10ක් ද සමගින්.