සංචාරක ශ්රී ලංකාව සහ එංගලන්තය අතර තුන්වන සහ අවසන් ටෙස්ට් තරගයේ සිව්වන දිනය අදයි.
ලන්ඩන් හි ඕවල් ක්රීඩාංගණයේ දී පැවැත්වෙන මෙම තරගයේ ජයග්රහණය සොයා යන ශ්රී ලංකාවට තවත් කඩුලු 09ක් අතැතිව ලකුණු 125ක් ලබාගත යුතුවනවා.
තරගය තුන්වන දිනට ඊයේ (08) නතර කරන විට ශ්රී ලංකාව සිය දෙවන ඉනිමට එක් කඩුල්ලක් දැවී ලකුණු 94ක් රැස්කරගෙන සිටියා.
නොදැවී කඩුල්ලේ රැඳී සිටි ආරම්භක පිතිකරු පැතුම් නිස්සංක ලකුණු 53ක් සහ කුසල් මෙන්ඩිස් ලකුණු 30ක් රැස්කරගෙන සිටිනවා.
තරගයේ පළමුව පන්දුවට පහර දුන් එංගලන්තය සිය පළමු ඉනිම සඳහා ලකුණු 325ක ලකුණු පුවරුවක් නිර්මාණය කළ අතර, ඊට පිළිතුරු වශයෙන් ශ්රී ලංකාවට පළමු ඉනිම සඳහා රැස් කළේ ලකුණු 263ක් පමණයි.
අනතුරුව ලකුණු 62ක වාසියක් ද සමඟින් දෙවන ඉනිම ආරම්භ කළ එංගලන්තය සිය දෙවන ඉනිම සඳහා සියල්ල දැවී ලකුණු 156ක් රැස් කළා.
ඒ, අනුව ජයග්රහණය වෙනුවෙන් ශ්රී ලංකාවට දෙවන ඉනිම සඳහා ලකුණු 219ක ඉලක්කයක් හිමි වුණා.
මෙම තරගය පැවැත්වෙන ලන්ඩන් නුවර ඕවල් ක්රීඩාංගණයේ ශ්රී ලංකාව ක්රීඩාකරන දෙවන ටෙස්ට් තරගය මෙය වන අතර,මිට පෙර ශ්රී ලංකාව 1998 වසරේ මෙම ක්රීඩාංගණයේ දී ටෙස්ට් තරගයකට සභාගීව තිබෙනවා.
එංගලන්තයට එරෙහිව ක්රීඩාකළ පස්වන ටෙස්ට් තරගය එය වූ අතර, එම තරගයෙන් කඩුලු 10ක දැවැන්ත ජයග්රහණයක් ශ්රී ලංකාව හිමිකර ගත්තා.
