පසුගියදා අරාබි මුහුදු ප්‍රදේශයේ දී අයිස් මත්ද්‍රව්‍ය කිලෝග්‍රෑම් 355කට අධික ප්‍රමාණයක් සමඟ අත්අඩංගුවට ගන්නා ලද සැකකරුවන් 11දෙනා ලබන 17 වනදා දක්වා රක්ෂිත බන්ධනාගාරගත කරන ලෙස කොළඹ මහේස්ත්‍රාත් අධිකරණය නියෝග කර තිබෙනවා.
පොලිස් මත්ද්‍රව්‍ය නාශක කාර්යාංශය විසින් මෙම සැකකරුවන් අද (09) කොළඹ අතිරේක මහේස්ත්‍රාත් හර්ෂණ කැකුණවල මහතා හමුවට ඉදිරිපත් කරනු ලැබූ අවස්ථාවේදියි අදාළ නියෝගය නිකුත් කරනු ලැබුවේ.
මෙම සිද්ධියට අදාළ පරීක්ෂණ තවදුරටත් සිදු කරන බවත් සැකකරුවන් රක්ෂිත බන්ධනාගාරගත කරන ලෙසත් එම කාර්යාංශයේ නිලධාරීන් අධිකරණයෙන් ඉල්ලා සිටියා.
එම ඉල්ලීම පිළිගත් මහේස්ත්‍රාත්වරයා අදාළ සැකකරුවන් ලබන 17 වනදා දක්වා රක්ෂිත බන්ධනාගාරගත කරන ලෙසටයි නියෝග කළේ.
පොහොර උර 30ක එම මත්ද්‍රව්‍ය තොගය බහා මෙම සැකකරුවන් විසින් ප්‍රවාහනය කර තිබූ බවත් විමර්ශනවල දී අනාවරණය වී තිබුණා.
සොයාගනු ලැබූ එම මත්ද්‍රව්‍ය තොගය ද අධිකරණයට ඉදිරිපත් කරනු ඇති.
