පසුගිය මාර්තු මාසයට සාපේක්ෂව අප්‍රේල් මාසයේ දී මෙරට උද්ධමනය සියයට 1.5ක් දක්වා ඉහළ ගොස් තිබෙනවා.
මේ අතර මෙරට නිල විදේශ සංචිත එක්සත් ජනපද ඩොලර් බිලියන 5ක් දක්වා ඉහළ ගොස් ඇතැයි මහබැංකු නවතම වාර්තා පෙන්වා දෙනවා.
කොළඹ පාරිභෝගික මිල දර්ශකයෙහි වාර්ෂික ලක්ෂ්‍යමය වෙනස මඟින් මනිනු ලබන මතුපිට උද්ධමනය, 2024 මාර්තු මාසයේ වාර්තා වූ සියයට 0.9 සිට 2024 අප්‍රේල් මාසයේ දී 1.5% ක් දක්වා ඉහළ යන ගොස් තිබෙනවා.
මෙහිදී ආහාර කාණ්ඩයේ උද්ධමනය අප්‍රේල් මාසයේ දී 2.9% ක් දක්වා පහළ ගොස් තිබීම විශේෂත්වයක්
2024 මාර්තු මාසයේ ආහාර උද්ධමනය 3.8% ක් ලෙස සටහන් වුණා.
ආහාර නොවන කාණ්ඩයේ මාර්තු මාසයේදී වාර්තා වූ සියයට 0.5 ක අවධමනයට සාපේක්ෂව අප්‍රේල් මාසයේ දී සියයට 0.9ක උද්ධමනයක් වාර්තා කර තිබෙනවා.
මේ අතර 2022 අගෝස්තු මාසයට පසු ඉහළම අගය වාර්තා කරමින් මාර්තු මාසයේ දී අපනයන ඉපැයීම්වල කැපී පෙනෙන වර්ධනයක් පෙන්නුම් කරනවා.
විදේශීය අංශයේ ක්‍රියාකාරීත්වය පිළිබඳ මහබැංකුව නිකුත් කළ නවතම වාර්තාවට අනුව පසුගිය වසරේ මාර්තු මාසයට සාපේක්ෂව සියයට 9.8ක ඉහළ යෑමක් පෙන්නුම් කරමින් එක්සත් ජනපද ඩොලර් මිලියන 1,139ක් දක්වා ඉහළ ගොස් තිබෙනවා.
ඒ, සඳහා රෙදිපිළි හා ඇඟලුම් අපනයන වර්ධනය වීම බොහෝ දුරට හේතු වී ඇතැයි මහබැංකුව පවසනවා.
කෙසේ වෙතත් මෙම වසරේ පළමු මාස තුනේ වෙළෙඳ හිඟය එක්සත් ජනපද ඩොලර් ඩොලර් මිලියන 1229 ක් දක්වා පුලුල් වී තිබෙනවා.
පසුගිය වසරේ අනුරූප කාලයේ වෙළෙඳ හිඟය වාර්තා වුණේ ඩොලර් මිලියන 896ක් ලෙසයි.
මහබැංකු දත්තවලට අනුව මාර්තු මාසය අවසන් වන විට චීන මහජන බැංකුවෙන් ලැබුණු ඩොලර් බිලියන 1.5ක විදේශ විනිමය හුවමාරු පහසුකම ද ඇතුළත්ව නිල සංචිත ප්‍රමාණය එක්සත් ජනපද ඩොලර් බිලියන 05ක් දක්වා ඉහළ ගොස් තිබෙනවා.
ඊට ප්‍රධාන හේතු වූයේ දේශීය විනිමය වෙළෙඳපොලෙන් සැලකිව යුතු ලෙස විදේශ විනිමය මිලදී ගැනීම් බව මහ බැංකුව පවසනවා.
වසරේ පළමු කාර්තුව තුළ ශුද්ධ මිලදී ගැනීම් එක්සත් ජනපද ඩොලර් බිලියන 1.2ක් ලෙස දැක්වෙනවා.
අප්‍රේල් 30 වැනිදා දක්වා මේ වසරේ ගත වූ කාලය තුළ එක්සත් ජනපද ඩොලරයට සාපේක්ෂව ශ්‍රී ලංකා රුපියල සියයට 9.1කින් අතිප්‍රමාණය වී ඇතැයි ද මහ බැංකුව පවසනවා.
