මාලිමාවේ ආර්ථික ප්රතිපත්තිය අපනයන ආර්ථිකයක් ද, ආනයන ආර්ථිකයක් ද කියා තමා විමසූ විට ඊට පිළිතුරු නොදෙන අනුර දිසානායක තමාට විවාදයකට ඇරයුම් කරන බවත්, තමන් සමඟ විවාදයට පෙර අනුර, සුනිල් හඳුන්නෙත්ති සහ හර්ෂණ සුරියප්පෙරුම සමග එක්ව වෙනම විවාදයක් සිදු කර තම නිවැරදි ආර්ථික ප්රතිපත්තිය රටට කිවයුතු බවත් ජනාධිපති රනිල් වික්රමසිංහ පවසනවා.
ජනාධිපතිවරයා මේ බව සඳහන් කර සිටියේ කුරුණෑගල දිස්ත්රික්කයේ විද්වතුන් සහ ව්යාපාරික ප්රජාව සමඟ කුරුණෑගල අස්ලිය ගෝල්ඩන් ක්රැසෙන්ඩා හෝටලයේ ඊයේ (10) පස්වරුවේ පැවති හමුවකට එක් වෙමින්.
මෙරට වගකීම භාර ගනිමින් ජාත්යන්තර මූල්ය අරමුදලේ සහයෝගය ඇතිව රටේ ආර්ථිකය ඉදිරියට ගෙන ආ බවත් ආයෝජන කලාප තවදුරටත් ඇති කරමින් ජනතාවගේ ජිවන බර සැහැල්ලු කිරීමට වැඩපිළිවෙලක් ඇති කරන බවත් ජනාධිපතිවරයා සඳහන් කළා.
ජාත්යන්තර මූල්ය අරමුදල සමඟ ඇතිකරගෙන තිබෙන කොන්දේසි කඩ කරමින් ආර්ථිකට හැසිරවීමට යාමෙන් මෙරට ආර්ථිකට විය හැකි හානිය පිළිබඳව ද ජනාධිපතිවරයා ප්රකාශ කළා.
කුරුණෑගල යන්න වාසනාවන්ත දිස්ත්රික්කයක් බවත් එම දිස්ත්රික්කයකට ස්මාර්ට් ඇග්රිකල්චර් හඳුන්වා දෙමින් පොල් වගාව දියුණු කිරීමට කටයුතු කරන බවත් මෙහිදී ජනාධිපතිවරයා සඳහන් කර තිබුණා.
මෙම හමුවට එක් වූ ජනාධිපතිවරයා වෘත්තීයවේදීන් සහ ව්යාපාරිකයන් විසින් මතු කළ ප්රශ්නවලට ද පිළිතුරු ලබා දීමට ද කටයුතු කළා.
