කාසල්රී ජලාශයේ විශාල වලවල් හාරා පරිසර විනාශයක් සිදු කරමින් අනවසරයෙන් මැණික් ගරමින් සිටි සැකකරුවන් 09 දෙනෙකු පොලිස් අත්අඩංගුවට ගෙන තිබෙනවා.
ජාතික විදුලි පද්ධතියට ප්‍රධාන වශයෙන් ජලය සපයන කාසල්රී ජලාශ ඉවුරේ විශාල වලවල් හාරා පරිසර විනාශයක් සිදු කරමින් මෙම සැකකරුවන් අනවසරයෙන් මැණික් ගරමින් සිටි බවටයි පොලිසිය සඳහන් කළේ.
නොර්වුඩ් ගැලැන්කන් වත්ත ප්‍රදේශයේ ජලාශය තුල පිරිසක් මැණික් කරමින් සිටින බවට ලද තොරතුරක් මත අද අලුයම නොර්වුඩ් පොලිසිය කළ වැටලීමකදී සැකකරුවන් අත්අඩංගුවට ගැනුණා.
ජලාශයේ ජල මට්ටම අඩු වීමත් සමග සැකකරුවන් ජලාශය තුලට පිවිස ගැඹුරට වලවල් හාරා වල තුල තිබූ ඉල්ලම් සහිත පස් ගොඩගෙන ජලාශයට සෝදා ඇති බවයි පොලිසිය කියාසිටියේ.
මෙම වැටලීමේදි සැකකරුවන් මැණික් ගැරීමට උපයෝගි කරගත උපකරණ රැසක් ද පොලිස් භාරයට ගෙන තිබෙනවා.
අත්අඩංගුවට ගත් සැකකරුවන් නොර්වුඩ් ප්‍රදේශයේම පදිංචිකරුවන් බව සඳහන්.
ඔවුන් පොලිස් ඇප මත මුදා හැර ඇති අතර, සැකකරුවන්ට එරෙහිව හෙට හැටන් මහෙස්ත්‍රාත් අධිකරණය හමුවේ නීතිමය පියවර ගන්නා බව පොලිසිය ප්‍රකාශ කළා.
මේ අතර මස්කෙළිය මහනෙලු වත්ත ප්‍රදේශයේදී බලපත්‍ර නොමැතිව මැණික් ගරමින් සිටි සැකකරුවෙකු අත්අඩංගුවට ගෙන තිබෙනවා. ඒ මැණික් ගැරීමට යොදාගත් උපකරණ ද සමගින්.
43 හැවිරිදි එම පුද්ගලයාට හෙට හැටන් මහේස්ත්‍රාත් අධිකරණයේ පෙනී සිටින ලෙසට දන්වා පොලිස් ඇප මත නිදහස් කර තිබෙනවා.
