වැඩ තහනමක ලක්ව සිටිය දී සියදිවි නසාගත් බව කියන මහා භාණ්ඩාගාරයේ විදේශීය සම්පත් දෙපාර්තමේන්තුවේ සහකාර අධ්‍යක්ෂ රංග නිශාන්ත රාජපක්ෂගේ අවසන් කටයුතු අද (02) පස්වරුවේ සිදුකිරීමට නියමිතව තිබෙනවා.
පශ්චාත් මරණ පරීක්ෂණයෙන් අනතුරුව ඔහුගේ දේහය ඔහු පදිංචිව සිටි කුලියාපිටිය, පහළ වීරඹේ ප්‍රදේශයේ පිහිටි නිවසේ තැන්පත් කර තිබෙනවා.
මහා භාණ්ඩාගාරයේ විදේශීය සම්පත් දෙපාර්තමේන්තුවේ ඩොලර් මිලියන 2.5ක් හැකර්වරයෙකු අතට පත් වූයේ යැයි කියන සිද්ධිය සම්බන්ධයෙන් මුදල් අමාත්‍යාංශයේ විදේශ සම්පත් දෙපාර්තමේන්තුවේ සහකාර අධ්‍යක්ෂවරයෙකු ලෙස කටයුතු කළ රංග නිශාන්ත රාජපක්ෂගේ වැඩ තහනම් කර තිබුණා.
එලෙස වැඩ තනමකට ලක්ව සිටිය දී පසුගිය 30 වනදා සැකකටයුතු ලෙස ගෙවත්තේ මියගොස් සිටිය දී ඔහු සොයා ගැනුණා.
මරණය සැකසහිත බැවින් දේහය සම්බන්ධයෙන් සිදුකරන පශ්චාත් මරණ පරීක්ෂණය සඳහා විශේෂඥ අධිකරණ වෛද්‍ය නිලධාරීන් සිව්දෙනෙකු පත් කරනු ලැබුවේ කුලියාපිටිය මහේස්ත්‍රාත්වරිය විසින්.
ඒ අනුව එම විශේෂඥ අධිකරණ වෛද්‍ය නිලධාරීන් සිව්දෙනා සිදුකළ පශ්චාත් මරණ පරීක්ෂණයෙන්, එම මරණය සියදිවි නසා ගැනීමක් බවට සඳහන් කරමින් වෛද්‍ය වාර්තාව ඉදිරිපත් කළ බවයි පොලිසිය පැවසුවේ.
මියගිය පුද්ගලයා විසින්ම පාද දෙක සහ අතක් පිහියකින් කපා ගෙන ඇති බවත්, ඒ හේතුවෙන් ඇති වූ අධික රුධිර වහනය සහ කම්පනය නිසා මෙම මරණය සිදුවී ඇති බවත් විශේෂඥ අධිකරණ වෛද්‍යවරුන් දැනුම් දුන් බව පොලිසිය සඳහන් කළා.
