ඉන්දිය ප්‍රීමියර් ලීග් තරගාවලියේ 53 වන තරගය කඩුලු හයකින් ජයගැනීමට කිංග්ස් ඉලෙවන් පන්ජාබ් කණ්ඩායම සමත් වුණා.
ඒ, චෙන්නායි සුපර් කිංග්ස් කණ්ඩායම පරාජයට පත් කරමින්.
තරගයේ ප්‍රථමයෙන් පන්දුවට පහර දුන් චෙන්නායි කණ්ඩායම නියමිත පන්දුවාර 20 තුළ කඩුලු 6 ක් දැවි ලබා ගත් ලකුණු සංඛ්‍යාව 134 ක්.
අනතුරුව පිළිතුරු ඉනිම ක්‍රීඩා කළ පන්ජාබ් කණ්ඩායම පන්දුවාර 13 ක් තුළ කඩුලු 4 ක් පමණක් දැවි තරගය ජයග්‍රහණය කළා.
මේ අතර තරගය අවසන් වීමෙන් අනතුරු චෙන්නායි කණ්ඩායමේ ක්‍රීඩක දීපක් චහාර් සිය පෙම්වතියට ආදරය ප්‍රකාශ කළා.
මේ වනවිට අදාළ සිදුවීම සමාජ මාධ්‍ය තුළ දැඩි කතා බහකට ලක් ව තිබීමත් විශේෂත්වයක්.
ජෙයා භරත්වාජ් නමැති තරුණිය ඉදිරියේ දණ නමා දීපක් චහාර් යෝජනාව ඉදිරිපත් කර තිබුණා.
ඇය ද එය වහා පිළිගත් බවයි, ඉන්දිය මාධ්‍ය වාර්තා කළේ.
ඔවුන් නවාතැන් ගෙන සිටි හෝටලයේ දී ඊට අදාළ සාදයක් ද පවත්වා ඇති බව ද සඳහන්.
මෙම ප්‍රේම යෝජනාව සිදු කරන ලෙස චහාර් දිරිමත් කර ඇත්තේ, චෙන්නායි කණ්ඩායමේ නායකයා වන දෝණි බවයි ඉන්දීය ක්‍රීඩා මාධ්‍ය වාර්තා කරන්නේ.
අවසන් තරගයට සුදුසුකම් ලැබීමෙන් අනතුරුව හෝ විශාල ජයග්‍රහණයකින් පසුව පෙම්වතියට තම ප්‍රේමය ප්‍රකාශ කිරීමට චහාර් සූදානමින් සිට තිබෙනවා.
ප්‍රේමය ප්‍රකාශ කිරීමට කල් නොගන්නා ලෙස පවසමින්, මෙම තරගයෙන් අනතුරුව එය ප්‍රකාශ කරන ලෙස දිරිමත් කර ඇත්තේ, හිටපු ඉන්දිය ක්‍රිකට් නායක දෝණි වීමත් විශේෂත්වයක්.
