රජයේ පාසල්වල දැනටමත් ගුරුවරුන් ලෙස සේවයේ නියුක්තව සිටින සියලුම සංවර්ධන නිලධාරීන් ගුරු සේවයට අන්තර්ග්‍රහණය කරගන්නා ලෙස ඉල්ලා ගොනුකර තිබූ මූලික අයිතිවාසිකම් පෙත්සම් ශ්‍රේෂ්ඨාධිකරණය හමුවේ සමථයකට පත් කර තිබෙනවා.
මෙම පෙත්සම් ඒ.එච්.එම්.ඩී.නවාස්, අචල වෙංගප්පූලි සහ ශිරාන් ගුණරත්න යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ අද (12) සලකා බැලුනා.
අදාළ පෙත්සම් ශ්‍රේෂ්ඨාධිකරණය හමුවේ කැඳ වූ අවස්ථාවේදී කරුණු දැක්වූ නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් විරාජ් දයාරත්න මේ වන විට ගුරු සේවයේ නිරත වී සිටින සංවර්ධන නිලධාරින් 25,000කට අධික පිරිසක් විශේෂ සම්මුඛ පරීක්ෂණයකට භාජනය කොට සුදුසුකම් සපුරාලන අය ගුරු සේවයට අන්තර්ග්‍රහණය කර ගැනීමට තීරණය කර ඇතැයි කියා සිටියා.
ඒ අනුව ජාතික පාසල් සඳහා අවුරුදු 40ක උපරිම වයස් සීමාවකට යටත්ව සහ පළාත් පාසැල් සඳහා අවුරුදු 45ක උපරිම වයස් සීමාවකට යටත්ව අදාළ බඳවා ගැනීම් සිදුකිරීමට තීරණය කර ඇති බවත් මෙම බඳවා ගැනීම්වලට අදාළ අමාත්‍ය මණ්ඩල පත්‍රිකාව කඩිනමින් අමාත්‍ය මණ්ඩලයට යොමුකර ඒ සඳහා අනුමැතිය ලබා ගැනීමෙන් අනතුරුව එම බඳවා ගැනීම සිදුකරන බවත් අතිරේක සොලසිටර් ජෙනරාල්වරයා දැනුම් දී තිබෙනවා.
මෙම කොන්දේසි සටහන් කර ගැනීමෙන් අනතුරුව අදාළ පෙත්සම් සම්මතයට පත්කිරීමටද අධිකරණය තීන්දු කර තිබුණා.
වසර ගණනාවක් ගුරු සේවයේ නිරතව සිටි තමන්ව ගුරු සේවයට අන්තර්ග්‍රහණය නොකිරීම තුළින් සිය මූලික මිනිස් අයිතිවාසිකම් උල්ලංඝනය වූ බවට තීන්දුවක් ලබාදෙන ලෙස ඉල්ලා සංවර්ධන නිලධාරීන් පිරිසක් විසින් මෙම මූලික අයිතිවාසිකම් පෙත්සම් ගොනුකර තිබෙනවා.
මේ පිළිබඳ නිවේදනයක් නිකුත් කරමින් අධ්‍යාපන අමාත්‍යාංශය පවසා සිටියේ, සංවර්ධන නිලධාරීන් ගුරු සේවයට අන්තර්ග්‍රහණය කිරීම පිළිබඳව විභාගය ගැනුණු නඩු විභාගය අද (12) දින සමථයට පත් වූ බවයි.
එම නඩු සමථයට පත් වීම පිළිබඳ තීරණය නිකුත් කරමින් විනිසුරු මඩුල්ල දන්වා සිටියේ දැනට අධිකරණයට ඉදිරිපත් ව ඇති අමාත්‍ය මණ්ඩල අනුමැතිය ඇති සමථ කොන්දේසි අනුව ක්‍රියාකළ යුතු බවයි.
ක්‍රියාත්මක වීමේ ස්වභාවය අනුව අවශ්‍ය වුවහොත් අදාළ පාර්ශවයන්ට මෝසමක් මාර්ගයෙන් නැවත නඩුව ආපසු කැඳවීමට අයිතිය ඇති බවත්, එම කරුණු මත නඩුව බහා තබන බවද විනිසුරු මඩුල්ල ප්‍රකාශ කළා.
මේ සඳහා මැදිහත්වීම්වන පෙත්සම්කාර පාර්ශවය වෙනුවෙන් ජනාධිපති නීතිඥ වී.කේ. චොක්සි සහ නීතිඥ ඩී. එස්. රත්නායක පෙනී සිටි අතර, වගඋත්තරකරුවන් වෙනුවෙන් නීතිපති දෙපාර්තමේන්තුව පෙනී සිටියා.
රජයේ පාසල්වල දැනට ගුරුවරුන් ලෙස සේවයේ නියුක්තව සිටින සංවර්ධන නිලධාරීන්ව ගුරු සේවයට අන්තර්ග්‍රහණය කරගැනීමට ජනාධිපතිවරයා ද මීට ඉහතදී සිය එකඟත්වය පළ කර තිබෙනවා.
පාර්ලිමේන්තුවේ දී ප්‍රකාශයක් සිදුකරමින් අධ්‍යාපන අමාත්‍ය සුසිල් ප්‍රේමජයන්ත මහතා ද ඒ බව තහවුරු කරමින් පවසා සිටියේ, එම සංවර්ධන නිලධාරීන් පිරිස අභ්‍යාසලාභීන් ලෙස බඳවා ගෙන ගුරු සේවයට අන්තර්ග්‍රහණය කරගන්නා ලෙසට ජනාධිපතිවරයා දැනුම්දුන් බවයි.
